Garagardo Festa Etxarrin

Guaixe 2016ko api. 21a, 17:58

Gaurtik igandera, eta bigarren urtez jarraian, jubilatu elkartearen parean jarritako karpan dozena bat garagardo mota dastatzeko aukera izanen da.

Garagardo Festak Etxarrin hartu duen karpak gaur, 19:00etan, zabalduko ditu ateak. Joan den urtean  gustura gelditu ziren emaitzarekin eta aurten errepikatzea pentsatu dute antolatzaileek. Antolakuntzan 20 bat etxarriar aritu dira, hainbat taldetan banatuta:  komunikazioa, eskaerak egiten, muntaian edota koordinazio lanetan. Karparen irekiera ordutegia, gaur eta bihar, 19:00etan izango bada, larunbatean 18:00etan irekiko da eta igandean 15:00etatik aurrera.

Jatekorik eta edatekorik ez da faltako karpan: kupeleko bost garagardorekin batera, botilako beste 6 dastatzeko aukera izanen da. Mahairatzeko aldiz, txerri ukondoa, bi saltxitxa mota, oilasko hegalak eta patata minak izanen dira. Gainera, ekitaldiak ere izanen dira: larunbatean, gauerditik aurrera, Luziano Show musika emanaldia eta, igandean, mus txapelketa azkarra. Azken horretan izena eman nahi duenak 15:00etatik aurrera du aukera; txapelketa 16:15ean hasiko da.