Larunbatean hiru hamarkada beteko dira NATOri buruzko erreferenduma egin zela. Hego Euskal Herrian ezezkoa nagusitu zen. Efemeridea gogoan Askapena erakunde internazionalistak biharko ekitaldiak antolatu ditu Altsasun. “Gaur inoiz baino gehiago aldarrikatu nahi dugu herrion burujabetza, elkartasun internazionalistaren defentsa sutsua egiteaz aparte. Herri bezala eskubidea dugu munduko herriak errespetuz, berdintasunez eta elkarren arteko osagarritasunez harremantzearen alde egiteko”.
Erakunde internazionalistak “bere garaian herriak ebatzi zuen bezala, egitura politiko-militar horretatik irteteko premia” aldarrikatu du. Eta, aldi berean, Euskal Herriak TTPari EZ kanpainaren baitan eginen diren ekimenetan parte hartzera deitu du; hainbat eragile sozial, sindikal eta alderdik bat egiten duten dinamikaren bidez TTIP (Merkataritza eta Inbertsioetarako Batasun Transatlantikoa, ingelesezko akronimoan) bezalako hitzarmen politiko ekonomikorik ez dadin gure herrian gauzatu.
TTIP
Amerikako Estatu Batuak eta Europa negoziatzen ari diren ekonomia hitzarmena da TTIP. Askapenaren iritziz, NATOren bidezko “ berrindartze politiko-militarrarekin aski ez eta inperialismo yankee-ak, aurrekaririk ez daukan bere hegemoniaren gainbeherak estututa, Europako potentziekin batera, bere proiektu ekonomiko-politiko neoliberala sakontzea erabaki du”.
Askapenatik gaztigatu dutenez, itun horren bitartez “are gehiago murriztu nahi dituzte lan eskubideak, ingurugiroaren babesa eta eskubide sozialak. Gainera, herri burujabetzari geratzen zaion apurra ezabatzeko helburua ere badu, horiek guztiak transnazional handien botere eta etekin gosearendako oztopo diren neurrian”. TTIPri Hilary Clintonek “OTAN ekonomikoa” deitu ziola gogorarazi dute.
Egitaraua
Martxoak 11, ostirala
19:00etan Hitzaldia: TTIP: la OTAN económica. Altsasuko Gure Etxea eraikinean.
Martxoak 12, larunbata
19:30ean Euskal Herriak OTAN-TTIPi ez! Kontzentrazioa, mural margotzea eta auzatea.
| NATOri buruzko erreferenduma, 1986ko martxoaren 12an | ||||||||
| Herria | Errolda | Botoak | Parte hartzea | Baliogabeak | Txuriak | Abestentzioa | Bai | Ez |
| Altsasu | 5515 | 3955 | 71,71 | 54 | 55 | 28,29 | 1192 | 2577 |
| Arakil* | 2174 | 1341 | 61,68 | 14 | 15 | 38,32 | 403 | 842 |
| Arbizu | 672 | 499 | 74,26 | 11 | 12 | 25,74 | 50 | 419 |
| Arruazu | 111 | 65 | 58,56 | 3 | 4 | 41,44 | 5 | 49 |
| Bakaiku | 294 | 207 | 70,41 | 1 | 2 | 29,59 | 17 | 179 |
| Ergoiena | 505 | 351 | 69,50 | 2 | 3 | 30,50 | 20 | 325 |
| Etxarri Aranatz | 1732 | 1224 | 70,67 | 11 | 12 | 29,33 | 143 | 1037 |
| Irañeta | 134 | 76 | 56,72 | 0 | 1 | 43,28 | 32 | 37 |
| Iturmendi | 325 | 239 | 73,54 | 9 | 10 | 26,46 | 45 | 159 |
| Lakuntza | 763 | 557 | 73,00 | 4 | 5 | 27,00 | 148 | 392 |
| Olatzagutia | 1514 | 1076 | 71,07 | 5 | 6 | 28,93 | 265 | 781 |
| Uharte Arakil | 686 | 446 | 65,01 | 13 | 14 | 34,99 | 125 | 282 |
| Urdiain | 606 | 411 | 67,82 | 6 | 7 | 32,18 | 61 | 336 |
| Ziordia | 338 | 257 | 76,04 | 5 | 6 | 23,96 | 72 | 169 |
| Sakana | 15369 | 10704 | 69,65 | 138 | 152 | 30,35 | 2578 | 7584 |
| *Irurtzun Arakilen barruan zegoen | ||||||||