Parlamentuak larunbateko manifestazio isila babestu du

Nafarroako Parlamentuko Bozeramaileen Batzordeak erakunde-adierazpena onartu du, zeinaren bidez Altsasun eta Nafarroa guztian bakearen eta elkarbizitzaren alde agertzen den. Geroa Baik, EH Bilduk, Ahal Duguk eta I-Ek onartu dute testua. Idatziaren aurreneko puntua aho batez onartu da. UPNk eta PSNk 2, 3, 5, 6 eta 7 puntuen kontrako botoa eman dute eta PPk 2tik 7ra arteko puntuen kontra egin du.

Adierazpenak, lehen-lehenik, Nafarroako Parlamentuak Altsasun eta Nafarroa guztian bakearekiko eta bizikidetzarekiko duen konpromisoa adierazten du. Bigarrenean, Nafarroako Parlamentuak “epaileen erabakiak errespetatuta ere, ikertutakoak terrorismo delitu gisa kalifikatzearekin” ados ez dagoela adierazten du. Horregatik, Espainiako Auzitegi Nazionaleko Instrukzioko 3. zenbakiko Epaitegiari, Nafarroako Lurralde Auzitegiari eta Fiskal Nagusiari auzia “berriz aztertzeko” eskatzen die, Iruñeko Instrukzioko 3. zenbakiko Epaitegira bueltatzea eskatuz, “harekin segitzeko eskuduna dela uste baitugu”.

Hirugarrenik, Nafarroako Parlamentuak atxiloketarekin eta behin-behinean jarritako kautelazko neurriekin desadostasuna azaldu du. Zazpi gazteen espetxeratzea “instrukzioaren garapenerako neurrigabea, justifikazio-gabea eta ez beharrezko” dela uste dute, “are gehiago haietako batzuk borondatez aurkeztu zirenean eta ihes egiteko arriskurik ez dagoenean”. Horregatik, haien askatasuna eskatzen da”.

Parlamentuak Altsasuz eman den irudi “desitxuratuagatik” arbuioa azaldu du, “errealitatetik urrun, herri sozialki plural eta desberdinen arteko elkarbizitzara ohitua” baita. Gertakarien aurrean altsasuarrek izandako jarreraren balioa aitortu du Parlamentuak. Aldi berean, erakundeak larunbateko manifestazio isilari babesa azaldu dio. Bestetik, Adingabeen Defendatzaileari eskatu dio auzian dauden bi adingabeen eskubideak errespetatuak izateko neurri egokiak har ditzala. Azkenik, adierazpenean aipatutako erakunde guztiei adierazpena bidaltzea erabaki du.