Udalak Tokiko Azpiegitura Planera zortzi proiektu aurkeztu ditu

Guaixe 2017ko mar. 24a, 10:40
Ardubil kalean aurreko hamarkadan egindako lanak.

Nafarroako Gobernuaren diru-laguntza jasoko balu 634.646 euroko balioko lanak eginen lirateke hurrengo urteetan.

Irurtzungo Udalak antzeman dituen beharrak eta bizilagunen eskaera zuzenak kontuan hartuta, Tokiko Azpiegitura Planera zortzi proiektu aurkeztu ditu. Guztiak egiteko Nafarroako Gobernuaren diru-laguntza ezinbestekoa izanen da. Egitasmo horiek udalak Irurtzun hobetzeko duen helburuarekin bat datoz, Aitor Larraza Carrera alkateak azaldu duenez.  

Proiektuak  
Lana Aurrekontua
Ardubil kalearen asfaltatzea eta zolaketa 28.206 €
Bi Ahizpe kalearen asfaltatzea eta zolaketa 9, 9bis, 11 eta 11 bis eraikin parean 65.018 €
Foru Plazako konponketa lanak 97.175 €
Atakondoa Eskola Publikoaren isolamendua hobetzea 66.295 €
Kiroldegiko ipar paretako ur sartzea konpondu 38.218 €
Leiho aldaketa Kultur Etxean eta Musika Eskolan 34.937 €
Kultur etxeko teilatu aldaketa 44.432 €
Argiteria publikoa LED teknologiara aldatzea 250.365 €


Tokiko Azpiegitura Plana
Halako planek herrietan makina bat lan egiteko aukera eman dute. UPNren aurreko legegintzaldian “gobernuak tokiko azpiegiturak finantzatzeko ez zuen inolako laguntzarik eman”, gogorarazi du alkateak, nabarmenduz Nafarroako Gobernuak 2017 – 2019rako Tokiko Azpiegitura Planaren Foru Legea onartu duela. “100 milioi erabiliko dira datorren hirurtekorako, eta tamaina txikiagoko eta sakabanatuak eta geografi handiagoko toki-erakundeek proposatutako inbertsioak lehenetsiko dira; horrenbestez, Nafarroaren lurralde-orekarako tresna izanen da” plan berria Larrazaren iritziz.