Lasterketa baten aurretik zer gosaldu dezakezuen jakiteko hainbat puntu garrantzitsu azalduko dizkizuet.
Lasterketa asko goizean goiz egiten dira, eta, horregatik, aurreko egunean edo egunetan zehar jaten dugunaz gain, garrantzitsua da lehiaketa edo probarako gosaria ondo planifikatuta edukitzea.
Hona hemen, kontuan izateko hainbat gomendio:
- Gosaria proba hasi baino 1-4 ordu lehenago egitea, digestioa egiteko denbora nahikoa izan dezazun. Duzun denboraren eta tolerantziaren arabera, zure gosaria ugariago edo urriagoa izan daiteke.
- Zure gosariak asimilazio errazeko karbohidratoetan aberatsa izan behar du, eta horrek esan nahi du integralak ez diren elikagaiak lehenetsi behar dituzula; hala nola, zereal zuriak, ogi zuria, zukuak, arroz edo olo edariak…
- Ez ahaztu hidratazio egokia funtsezkoa dela lasterketa baldintza onenetan hasteko. Edan baso bat ur esnatzean eta lehiaketara irten aurretik. Isotonikoak ere edan ditzakezu, gatzak edota elektrolitoak eskuratzeko aukera gisa. Honetarako, ingurumen-baldintzak kontuan hartu behar dira.
- Ez dastatu ezer berria! Probaren egunean, ez da lehen aldiz ezer dastatzen. Gosaria aurretik entrenamenduetan ere probatu behar duzu, digestio-mailako urduritasunak, ezustekoak, intolerantziak… saihesteko.
- Kafeinak eragin positiboa izan dezake zure errendimenduan, betiere aurretik probatu baduzu. Hala ere, ziurtatu digestio-arazorik sorrarazten ez dizula. Kafe, te edo osagarrien bidez eskuratu dezakezu.
- Digestioa errazteko, saihestu gantza eta zuntz askoko elikagaiak. Hauek digestioa moteltzen baitute, eta litekeena da lasterketan arazo gastrointestinalak sorraraztea. Proteinari dagokionez, digestio errazekoak sar ditzakezu, betiere zure tolerantziaren arabera.
- Hasi aurretik ere, karbohidrato estra bat har dezakezu digestio errazeko zerbaitekin: deshidrataturiko fruta, isotoniko, fruta edo barrita batekin.
Gosari adibide gisa, kafea, ogi zuri tostada gazta fresko eta marmeladarekin, ezti edota irasagarrarekin izan daiteke milaka aukeren artean bat.