Burundar Txistulariek joan den urtean estreinakoz kontzertua eskaini zuten eta primerakoa izan zenez, hura bukatu bezain laster emanaldi berria prestatzen hasi ziren. Juan Pablo Urizarrek esan digunez, “txistua kalean ongi errotua dago, festetan, kalejiretan. Emanaldi hauekin txistuaren beste kontzeptu bat eman nahi dugu. Areto itxian, kontzertu baterako ere balio duela txistuak”. Eta gaineratu du: “txistua beste musika tresnekin uztartuz sortzen diren akonpainamendu atseginekin gozatzeko gonbitea da”.
Burundar Txistulariak hamabost bat dira. Eta joan den urtean bezala haiekin batera Araba, Burlata eta Iruñeko txistulariak ere izanen dira. 20 bat guztira, txistuen bi ahots ea silbotearekin banatuta. Baina ez da dena txistua izanen. Txistulari alardeetan egiten den moduan, txistuak bere protagonismoa beste instrumentu batzuekin partekatuko du. Hala, Josu Aiestaran, Konstan Gonzalez, Asier Palacios, Sergio Gastaminza eta Jesus Irisarrik osatutako metal boskotea aldamenean izanen dute (bi tronpeta, tronboia, bonbardinoa eta tuba). Javier del Rio baxuarekin ariko da. Kantuan, berriz, Itziar eta Erkuden Flores ahizpak. Guztien doinura dantzan ariko dira Etorkizuna dantza taldeko lauzpabost dantzari.
Obra mustu
Egitaraua osatzerakoan joan den urtean arrakasta izan zuen formularen alde egin dute du atzera ere Burundar Txistulariak: Erdi Arotik gaur egunera arteko piezak jasotzen duen programa prestatu dute biharko. Musikaren historian barreneko errepaso azkar horretan txistua swing edota ska doinuak jotzen entzuteko aukera izanen da. Ez hori bakarrik. Burundar Txistulariak taldeko kide Carlos Sanchezen Burundarrak kalejira ere mustuko dute. “Pieza mugitua, entzun erraza”, Urizarrek aurreratu digunez.
Txistulariak & friends, eta lagunak, izenburua eman diote kontzertuari. Urizarrek esanetan: “musikariak lagunak gara eta ongi pasatzera joanen den publikoa ere laguna da. Horregatik, friends hori”. Azken urtean lagunak nor bere alde egon dira entseatzen. Igandean guztiak elkarrekin aurreneko kontzertua egin zuten eta larunbatean bertan azken doikuntzak eginen dituzte.
“Musika eskoletako eta herrietako ikasleek beste instrumentu eta jendearekin txistuak aukerak dituela ikus dezakete”
Egitaraua
Obra Egilea Moldaketa
Pavane Tielman Susatonem, 1555 Karlos Sanchez
Terpsichone Michel Praetorivs, 1612 Karlos Sanchez
Mendiko soinua Jesus Guridi
Tolosa Leandro Zabala Txomin Agirregomezkorta
Zortziko Candido Albistur
Txapela buruan Karlos Sanchez Ekiza
Ibai Ona Joaquin Iruretagoiena
Otxandio Antolin Mendizabal JM Bastida
Baldorba Benito Lertxundi Ismael Yague
Eperrak Niko Etxart Karlos Sanchez Ekiza
Otxoal Migel de Oñate
Momotxorroen dantza Herrikoia Karlos Sanchez
Burundarrak Karlos Sanchez Ekiza