Tabernaren azkena Malagan

Guaixe 2016ko api. 27a, 10:05

Zinemetara garagarzaroaren 3an iritsiko da, Alfa Pictures banaketa etxearekin.

Malagako zinema jaialdian, lehiaketatik kanpo, Helena Tabernaren Acantilado filma ikusteko aukera izan zen asteartean.  Zinema zuzendari altsasuarrak Lucia Etxeberriaren El contenido del silencio liburuaren moldaketa eraman du iruditara. Gidoia Tabernak, Andres Martorellek eta Nacho Lopezek idatzi dute. Joan den urtean filmatu zuten, Gipuzkoan, Kanaria Handian eta Nafarroan.

Sekta batean sartua dagoen arrebaren bilaketari ekinen dio anaiak suizidio kolektibo baten berri izatean. Horixe filmaren haria. Jon Kortajarenak, Goya Toledok, Juana Acostak eta Daniel Graok jokatu dituzte pertsonaiak. Pantailan ere Assunpta Serna, Ingrid Garcia Jonsson eta Xabier Elorriaga agertuko dira. Musika Anejel Ilarramendirena da. Filmak 2,5 milioi euroko aurrekontua du eta Lamia ekoizte-etxeak ekoiztu du TVEren, ETBren, Moviestar+en, Euskaltelen, Kanaria Handiko Kabildoaren eta Nafarroako Gobernuaren laguntzarekin.