Asteburu betea du Erkudengo Ama abesbatzak. Gaur eguberri kontzertua eskainiko du. Abesbatzatik esan dutenez, “gaur egun Altsasun oso momentu zailak pasatzen ari diren pertsonak eta euren familiak gure bihotzean egonen dira kontzertuan. Gure elkartasuna adierazi nahi diegu eta Altsasuko herriari gure kontzertua eskaintzea da gure asmoa”
Normalean emanaldi horrekin despeditzen dute urtea. Baina bihar abesbatza altsasuarra Flamenco etxea ikuskizunean parte hartzekoa da Haize Berriak bandarekin, Jose Luis Montonekin eta Gorka Hermosarekin batera. Abesbatzatik azaldu digutenez, “oso urte bizia izan da. Proiektu askotan parte hartu dugu: Sakana Maitia emanaldian eta bideokliparen grabazioan, filmetako musikaren monografikoan, Holandako bidaia, zenbait elkartruke eta kontzertuak… Guztiarekin oso lanpeturik ibili gara eta koralista guztiei eskerrak eman nahi dizkiegu egin duten ahaleginagatik”.
Urte berrirako asmo berrien bila dabiltzanendako aholkua ere badute: “jendea abesbatzan kantatzera animatu nahi dugu. Oso atsegina izateaz aparte, osasuntsua da eta bizitzen diren esperientziak ahaztezinak dira. Gure ateak irekita daude kantatzea gustuko duzuen guztiendako”.
Egitaraua | |
Abestia | Egilea |
Malaika | Tanzaniako gabon kanta |
Egizu lo | P. Jorge de Riezu |
Lua, lua | Herrikoia. Mold. J. Ezkurra |
Gabriel´s oboe | E. Morricone. Mold. JL Gorospe |
Arkume ta gaztakin | Herrikoia. Mold. L. Ondarra |
Por los caminitos de Jerusalem | E. Correa |
Romance del establo de Belen | E. Correa |
Adeste fideles | J. Reading |
El pequeño tamborilero | Katherine K. Davis |