Ferietako liskarraren ondorioz hiru altsasuar preso daude Soto del Real espetxean. “Ezinen dute festaz gozatu bere senide eta lagunekin batera” gaztigatu dute herri-asanbladatik. Horregatik, biharko elkartasuna adierazteko bi deialdi egin dituzte. 12:45ean jarri dute hitzordua Iortia kultur gune parean. Elkartasun argazki erraldoia egin nahi dute lehenik eta, ondoren, zortzikoa dantzatu. Herri-asanbladatik kinto ospakizunei elkartasun kutsua emateko zapia janzteko deialdia luzatu dute. Era berean, herri-asanbladak polizia-muntaia eta “Altsasuko zirku handia” salatzeko martxoaren 4an, hiri-inauterian, zirkuz mozorrotzeko gonbidapena egin du.