Altsasuko CBASK saskibaloi taldeak, Altsasuko Gazte Asanbladak eta Altsasuko Udalak Altsasukoak Aske 3x3 Saskibaloi Txapelketa antolatu dute martxoaren 31n, larunbatean, goizeko 10:00etatik aurrera Zelandi kiroldegian jokatuko dena.
Txapelketan hiruzpalau kidez osatutako taldeek hartuko dute parte; gehienez 2 izango dira federatuak. Talde bakoitzak 5 euro ordaindu beharko ditu, eta izena ematea egunean bertan zabalduko da, goizeko 9:30ean, edo aurretik WhatsApp bidez eman daiteke, 608 163 752 telefonoan.
Ondoren, bazkaria eta gaupasa
Goizeko 10:00etatik aurrera jokatuko da 3x3 Saskibaloi Txapelketa eta goiz guztian barna gauzatuko da. Baina festa borobildu dute. Horrela, bazkaria prestatu dute, 15:00etarako, Amandrea elkartean (Martxoaren 29a da izena emateko azken eguna) eta arratsaldean, 18:30ean, Altsasukoak Aske! Ekimena burutuko dute. Ondoren, gauean, gaupasa antolatu dute gaztetxean, DJ Patxipunk, DJ Txen eta talde sorpresarekin.