Olatzagutiko Gazte Asanbladak gaztetxearen 23. urtebetetzea ospatzeko egitaraua prestatu du biharko. Eguerditik aurrera eta ordu txikiak arte iraunen duten parrandarako aitzakia ederrak daude programan. 12:30ean piztuko dute festa hasierako etxajua eta hura lehertu ondoren triki-poteoari ekinen diote. 15:30ean eseriko dira bazkaltzera. Postrearekin batera Saats Karasatorre eta Joanes Illarregi bertsolarien txanda izanen da. Biek bazterrak ederki zirikatu ondoren, poteo latzari ekinen diote gazteek. Ospakizuna despeditzeko, 23:30etik aurrera El Sonido de la Metralla, Nafarroa 1512 eta Txapel Punk taldeen kontzertuak izanen dira gaztetxean.
