Zaindari ontzat dute altsasuarrek Erkudengo Ama. Haren irudia hilaren 2an herrira ekarri zuten eta arratsaldeko mezaren ondoren Ama Birjina Erkudengoa kanta abestu zuten. Doinu bera domekan entzunen da, behin bederatziurrena despedituta irudia Ulaiar dermioko ermitara bueltatu eta mezaren ondoren. Fededun altsasuarrak 09:30ean abiatuko dira elizatik eta Larrezabal eta Murgilarteko bideetatik barna N-1 errepide zaharrera aterako dira, ermitara joateko. 11:00etan hasiko da meza. Eta akaberan izanen da herriko kanta abesteko garaia.
Elizkizunaren ondoren bildutakoek gosaldu eginen dute. Jatekoa bulkatzeko udalak ardoa eta mostoa banatuko ditu. Ondoren, altsasuarrek txistularien aireak dantzatuko dituzte. Hangoa despedituta, herrian bazkari bat baino gehiago eginen dira.
Ama Birjina Erkudengoa
Ama Birjiña Erkudengoa
elurretako zuriya.
Esku batian iguzkiya ta
beste eskuan auriya.
Hark guretako gorderik dauka
komeni zaigun guziya.
Igurai on bat daukagularik
ermita txiki batian.
Hodeiak eta tenpestadiak
bialtzen ditu bertatik.
Eta frutubak oso ta leiyal
gordetzen ditu gugatik.
Ama Birjiña Erkudengoa
pekatarien ama zu,
pekatutikan libratutzeko
arkitasun bat egidazu.
Edo bestenaz galdu naiz ni
desanparatzen banauzu.
Lurreko plantak eukusi ezkero.
Nezesidade haundian,
Altsasuarrak dute kostunbre
disponitzia herrian,
Ekar dezagun Erkur indarra
ia gandegu premian.
