guaixe.eus

Arroz festa anitza

  Gizartea  Altsasu

Domekan 13:00etan joatea gomendatu dute, arrozak ia prest daudela, sukaldarien eta bisitarien artean hartu-eman aberatsa sortzeko.

Arroz festa anitza
Juan Pedro Higuero (Sakana Harrera Harana), Josu Rubio (Sakana Harrera Harana), Arantza Erbiti (Burunda mendebaldeko Gizarte Zerbitzuko Mankomunitateko koordinatzailea), Milena Yordanova Nikolava (Bulgaria), Najat Sbai, Begoña Zes | Ikusi handiago | Argazki originala

Munduko Arrozak ekimenaren laugarren edizioa izanen da festetako domekan. Maroko, Ekuador, Bangladesh, Valentzia, Sahara eta Sakana Harrera Haranako kideak arrozak prestatzen izanen dira Zubeztia plazan jarritako karpan. 11:00etan hasiko dira zazpi sukaldari taldeak euren arroza prestatzeko osagaiak txikitzen eta su eztian guritzen. Herrialde bakoitzean arroza nola prestatzen den eta zer osagai erabiltzen dituzten bertatik bertara ezagutzeko aukera aparta da domekakoa. Gainera, 14:00etan, prestatutako arrozak dastatzeko emanen dituzte.

Zubeztia plazatik domeka eguerdian pasatzen direnek, sukaldariak lanean ikusteaz aparte, musika eta haurrendako txokoa izanen dituzte. Gainera, Sakana Harrera Harana taldekoek erakusketa jarriko dute.  Errefuxiatu kanpamentuetan lanean aritutako sakandarrei argazkiak bidaltzeko eskatu zieten. Jende asko egon da errefuxiatu eta migratzaile eremuetan laguntzen eta argazki sorta ederra lortu dute. Haren lagin bat karpan ikusgai jarriko dute. Horietaz aparte, Zaska Zurrumurruen Aurkako Nafarroako Sareko kideak izanen dira ere. Bestalde, Sakanako Mankomunitateko kultur bitartekaria Youssef Chahor han izanen da.

Sakanako Mankomunitateko Anitzartean Zerbitzuak, Burunda mendebaldeko Gizarte Zerbitzuen Mankomunitateak eta herri mugimenduak antolatu dute ekimena. Domekan karpa berean jatorri eta kultura desberdinetako altsasuarrak batuko dira.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa

Laguntzaileak