“Ez gaude hemen bakarrik. Badaukagu jende asko bultzada ematen”. “Errigora da arnasa hartzeko proiektua”. “Auzolanera sekulako ilusioarekin joaten gara. Gurasoendako oso inportantea da hor lan egitea, jende pilarekin egoten gara. Jende hori boluntario dator gu laguntzera. Guretako oso inportantea eta hunkigarria da”. “Bertako euskaldunendako eta euskara ikasi nahi dutenendako pizgarri bat da ikustea nahikoa ahaztua dagoen txoko hau hain ahaztua ez dagoela”. Erentzun (Viana), Ibaialde (Lodosa) eta Argia (Tutera) ikastoletako eta Erriberako AEK-ko arduradunek hitzak dira horiek guztiak. Ekonomiaz aparte, Errigora kanpainak haiendako duen esanahia laburbiltzen dute.
Izan ere, Nafarroako hegoaldeko euskalgintzak Errigoraren #Euskararipuzka kanpainaren bidez azken bost urteetan babesa jaso du. Baita ekonomikoa ere: 800.000 euro. Poltsa horretatik jasotako diruarekin Erriberako AEK-k klaseen %75a baino gehiagora joandako ikasleendako beka sistema jarri du martxan jarri du ikasleen matrikula gastuak arintzeko. Hegoaldeko hiru ikastolek arnasa lasaiago hartu, konponketak egin eta azpiegiturak atondu dituzte. Eta Sortzenek euskaraz bizi eta ikasteko eskubidearen aldeko dinamikak hauspotzera bideratu du. Lege aldaketarekin D ereduan matrikulatzearen aldeko kanpainak egin dituzte eta dagoeneko 8 herrietan sortu dira euskarazko lerroak.
Eskaera garaia
Aurreko guztiak dira Errigoraren Nafar hegoaldeko puska, euskarari puzka kanpainaren onurak. Baina hori egin ahal izateko #Euskararipuzka kanpainan eskaera egin behar da. Erriberako 23 ekoizleren produktuak kutxa txurian (berritasunak eta produktu bereziak) eta beltzean (klasikoa) banatu dituzte. Oliba olioa, zainzuriak, pikillo piperrak, orburuak, ozpina, arroza, ardoa, melokotoi kontserba, potxak, pastak eta bestelakoak opatu daitezke kutxa horietan. Bakoitza 50 eurotan dago salgai eta irabaziaren laurdena Erriberako euskalgintzara bideratzen da.
Errigora kutxak eskatzeko epea gaur zabaldu eta azaroaren 14ra arte dago irekita. Sakanako ikastoletan, euskaltegian eta hainbat tabernatan eta dendatan egin daiteke eskaera. Kutxen banaketa azaroaren 29aren eta abenduaren 4aren artean eginen da. Orduan pagatu beharko da. Baina bitartean kutxak prestatzeko Ablitasko auzolanean parte hartu nahi dutenek azaroaren 9 eta 10 gorde beharko dute agendan.
Bestelako eraginak
Ekimenak balio izan du ere euskal jendartean elikadura-burujabetzaren ideia zabaltzeko. Izan ere, merkaturatze eta kontsumo-ohituretan eragin nahi du Errigorak eta tokiko produktuen kontsumoa sustatzea. Nafarroako hegoaldeko ekoizleengandik jasotzen dira produktuak. Haietako batzuk ekologia-ekoizpenera hurbildu dira eta sail berriak lantzeko nekazariak eta ekoizleak harremanetan jarri dira. Hori guztia herrigintzatik eta auzolanean egin dute, udaberriko eta udazkeneko kanpainen bidez.
Non eskatu | |
Herria | Non |
Irurtzun | Iratxo elkartea |
Pikuxar euskal txokoa | |
Ihabar | Elkartea |
Irañeta | Elkartea |
Uharte Arakil | Mendikoa |
Arruazu | Ostatua |
Lakuntza | Eskola |
Tania arrandegia | |
Bittori janari-denda | |
Arbizu | Eskola |
Etxarri Aranatz | Andra Mari ikastola |
Kaxeta liburu-denda | |
Udaletxeko estalopean | |
Bakaiku | Elkartea |
Iturmendi | Elkartea |
Urdiain | Mareo |
Altsasu | Itsasi euskaltegia |
Iñigo Aritza ikastola | |
Txioka haur ikastola | |
Portuko okindegia | |
Biltoki taberna | |
Olatzagutia | Eskola |
Barandi taberna | |
Ziordia | Etxaleku taberna |