Fara-joleen buruzagia aukeratuko dute gaur

Errege magoei Altsasuko bidea azaltzeko, nesaki eta mutiki ugari biltzen dira plazan ilbeltzaren 5ean, 17:30ean. Lehenik Alde Zaharrean barna hotsa dariola buelta bat ematen dute. Eta behin plazan bueltan daudela, txikienen artean esnezko opilak banatzen dira, 350en bat. Haietako baten barruan fara txiki baten irudia du. Hura opatzen duena, izendatzen dute fara-joleen buru. Nafarroako Himnoa entzunen da eta txapela, narrua eta dozena bat fara txiki dituen gerrikoa aurreko errege edo erreginaren eskutik jasoko du. Guztia egoki jarrita gainontzeko faradunen aginte makilarekin herrian barna korrika joanen den hots handiko segizioa sortuko dute. Ondoren, errege magoen segizioa zabaltzen duen gurdian joanen da.

1976tik egiten da horrela, Enrike Zelaiak eta Luis Mari Lopez de Goikoetxeak ohitura berreskuratu eta errege segizioaren parte bihurtu zutenean. XX. mendeko 50. hamarkadan galdu zen ohitura, errege segizioarekin. Zelaiaren inspirazio iturri Muthiko Alaiak peñak antolatzen duen Fabako Erregearen ospakizuna izan zen.