Altsasuko egun handia

Guaixe 2019ko uzt. 1a, 13:53

San Pedro eguna ospatu zuten altsasuarrek larunbatean. Egunerako beroagatik alarma gorria piztu zuten, baina ez zen Altsasuko egun handia ospatzeko oztopo izan. Altsasuko auziagatik espetxeratutako gazteak gogoan izan zituzten ere

Urtero bezala, San Pedro ermitara erromeria egin zuten altsasuarrek ekainaren 29an, sainduaren egunean. Sanpedrozelaian meza egin zen, baita zortzikoak dantzatu ere. Aurtengo etsai nagusia beroa izan da, eta haizemaileak eta ura botatzeko tresnak izan ziren eguneko protagonistak. Udalak zilarrezko tazetan ardoa eman zuen, eta, bazkaldu ostean, puruak banatu zituen.

Eguerdian, Altsasuko auziagatik espetxeratutako gazteen aldeko zortzikoa dantzatu zuten altsasuarrek. Altsasu Gurasoak taldeak esan zuenez: "Altsasuko herriak, San Pedroko erromerian, gure seme-alabendako justizia eskatzen jarraitzen du".