Soroak eta basoak zaindu eta babesten dituen igurai edo zaindari ona da Erkudengo Ama. Hala kantatzen diote urtero altsasuarrek bere egunean. Eta, atzera ere, eginen dute igandean. Ama birjinaren irudia urte guztian ermitan izaten da, bederatziurrenerako herrira ekartzen duten aldian izan ezik. Hura presente izan da egun horietako 20:00etako mezetan.
Bederatziurrena despedituta, Erkudengo Amaren irudia bere ermitara bueltan eramanen dute altsasuarrek. Egiteko hori igandean, 09:30 aldera eginen dute. Larrezabal, Murgileko bidetik barna, N-1 errepide zaharrera atera zen segizioa eta handik Ulaiarko ermitaraino iritsiko dira. 3,5 km-ko bidean irudia bizkar gainean eramanen dute hainbaten artean. 11:00etan meza izanen da. Eguraldiak laguntzen badu 1791n ermitari egindako aterpean jarriko dute Erkudengo Amaren irudia eta handik emanen du meza apaizak. Elizkizunaren akaberan ama birjinari eskainitako abestia kantatuko dute altsasuarrek.
Elizkizunaren ondoren ermita inguruan elkartutakoek gosaldu eginen dute. Jatekoa bulkatzeko udalak ardoa banatuko du. Txistularien txanda izanen da ondoren, jota, porrusalda eta zortzikoa joko dituzte. Lagun taldeak elkarrekin bazkalduko dute.
Ama Birjina Erkudengoa
Ama Birjiña Erkudengoa
elurretako zuriya.
Esku batian iguzkiya ta
beste eskuan auriya.
Hark guretako gorderik dauka
komeni zaigun guziya.
Igurai on bat daukagularik
ermita txiki batian.
Hodeiak eta tenpestadiak
bialtzen ditu bertatik.
Eta frutubak oso ta leiyal
gordetzen ditu gugatik.
Ama Birjiña Erkudengoa
pekatarien ama zu,
pekatutikan libratutzeko
arkitasun bat egidazu.
Edo bestenaz galdu naiz ni
desanparatzen banauzu.
Lurreko plantak eukusi ezkero.
Nezesidade haundian,
Altsasuarrak dute kostunbre
disponitzia herrian,
Ekar dezagun Erkur indarra
ia gandegu premian.