Tren geltokiko txarteldegia martxoaren 31era arte izanen da zabalik

Gauzak aldatzen ez badira, martxoaren 31n, asteartez, Altsasuko tren geltokiko txarteldegia itxi eginen da. Apiriletik aurrera tren geltokira joaten direnak makinetan atera beharko dute bidaia-txartela. Bestela, aurretik Irurtzungo edo Altsasuko Correos bulegoetatik edo bidaia agentziaren batetik pasa, www.renfe.com web orrira jo, 912 320 320 telefonora hots egin edo Renfe Ticket mugikorrendako aplikazioa erabil beharko dute. Hala jakinarazi digute tren zirkulazioaz arduratzen diren bi langilek: “guk jende guztiak dakien gauza bera dakigu, txarteldegia martxoaren 31ra arte zabalik izanen dela”. 

Renfek urtearen hasierarekin batera itxi zuen txarteldegia. Horretarako, argudiatu zuen egunero bataz beste ehun bidaiari baino gutxiago eta urtean 250.000 euro baino fakturazio txikiagoa zuela. Espainiako Gobernuko presidentea izendatzeko negoziazioetan PSOEk eta Teruel Existek akordioa lortu zuten 142 txarteldegiren itxiera eteteko.  

Ibarra egituratzen ez duen trena 
Sakana punta batetik bestera zeharkatzen du trenbideak. Joan den mendeko 80ko hamarkadan herri guztietako geltokietan eta geralekuetan gelditzen ziren trenak, egurrezko aulkiak eta konpartimentuak zituzten bagoiak eramaten zituenak. Pitteka geralekuak eta geltokiak ixten joan ziren (Bakaikuren kasuan bota ere). Gaur egun Izurdiaga, Uharte Arakil, Etxarri Aranatz eta Altsasuko tren geltokiak daude. 

Iruñea eta Gasteiz, norabide bakoitzean, egunero hirutan egiten dute trenek. Baina trenak ez dira Izurdiagan gelditzen, ez bada tren batek bestea aurreratzeko maniobra egiteko. Uharte Arakil, Etxarri Aranatz eta Altsasuko geralekuak dira gelditzeko toki bakarrak. 6 tren egunero, bost igandeetan. Altsasuko tren geltokia joan den mende hasieran gaur egungo aireportu baten parekoa zen. Iruñeko politikoak hara joan behar izaten zuten Donostiarako bidean zihoazen Madrilgo agintariekin biltzeko. Bidaiari eta merkantzia garraio handia zegoen. Bertako ostatuan makina bat ezkontza-oturuntza egin ziren. Joandako garaiak dira horiek, gaur egun Irun eta Gasteiz lotzen dituzten trenez aparte, Bartzelonara eta Galiziara joaten direnak besterik ez dira gelditzen. 6 egunean.