Hotz ikaragarria eta haizea izan ziren larunbateko protagonistak, baina Altsasuko X. Duatloia, aldi berean Nafarroako Txapelketa izan zena, oso arrakastatsua izan zen. Goi mailako kirolariak eta herrikoiak, guztiek sekulako maila eman zuten. Goizeko Nafar Kirol Jolasak eta arratsaldeko kadete eta junior proba eta erreleboak kontuan hartuta, 330 kirolari baino gehiago lehiatu ziren. Sakandarrak oso ongi aritu ziren. Gazteen mailan Hegoi Lakuntza altsasuarra bigarren sailkatu zen, erreleboetan Eneko Aramendia eta Joseba Galarza iturmendiarrak gailendu ziren eta proba absolutuan Mikel Astiz Nafarroako txapeldunordea izan zen, Miguel Seron txapeldunaren ondotik.