Nafarroako Gazteriaren Institutuari lotuta dago Altsasuko Otadiako Santo Kristo gazte aterpetxea eta prestakuntzarako Baliabide Zentroa. Institutuak jakinarazi duenez, eraikineko sukalde-jantokiaren aurtengo kudeaketa eman nahi du kontratu bidez. Horretarako deialdia egin du. Horren truke enpresa hartzaileak 40.289,26 euro (BEZ kanpo) jasoko ditu. Kopuru hori lortzeko, kalkuluen arabera, 2021. urterako 2.500 pentsio oso fakturatuko dira. Mantenu osoaren gehieneko prezioa 19,50 eurokoa da (BEZa barne).
Kudeaketa hartzen duen enpresak elikadura-zerbitzuengatik kobratzeaz arduratuko da, Nafarroako Gazteriaren Institutuko Gobernu Kontseiluak urtero eta kontratuak irauten duen bitartean onartzen dituen prezioen arabera. Nafarroako Gazteriaren Institutuaren Gobernu Kontseiluaren 2020ko azaroaren 20ko Erabakiaren bidez onartutako prezioak aplikatuko dira. Prezio horiek maximoak izango dira, eta emakidadunek tarifa txikiagoak aplikatu ahal izango dituzte, egokitzat jotzen dutenean. Bestalde, kontratua behar bezala garatzeko, enpresak behar diren langileak izan beharko ditu.
Sukalde- eta jantoki-zerbitzua ustiatzeagatiko kanona urteko finkoa izango da, eta gutxienez 839,23 eurokoa izanen da. Kontuan hartuta kontratuak urtebete baino gutxiago irauten duela, kanonaren behin betiko zenbatekoa kontratuaren iraupenarekiko proportzionala izanen da, eta Nafarroako Gazteriaren Institutuak horretarako ematen duen ordainketa-gutuna ordainduz ordainduko da.
Kanona kontratua gauzatzen hasi eta hurrengo 30 egun naturaleko epean ordainduko da. Horretarako, dagokion zenbatekoa Nafarroako Gobernuak ezarritako moduan kontsignatu izanaren egiaztagiria aurkeztu beharko da.
Esleipendunak ezarritako kanona berandutzen badu, Administrazioak premiamendu-bidean kobratzeko eskatu ahal izango du, hargatik eragotzi gabe kontratua ez betetzeagatik kontratua suntsiarazi dela deklaratzea.