Administrazio publikoekin mantendutako harremanetan identifikazio elektronikorako sistema da Cl@ve. Haren bidez herritarrek administrazio publikoen zerbitzuetara Internet bidez sartzeko aukera dute. Sisteman izena eman beharra dago sarbide datuak eskuratzeko. Altsasuko Udalak jakinarazi duenez, Gure Etxea eraikinean dagoen udal erregistroan Cl@ve eskuratzeko aukera dago asteazkenaz geroztik. Cl@ve identifikazio elektronikoko sistema eskatzeko herritarrek identifikazio agiri bat beharko da (nortasun agiria, pasaportea edo atzerritarren identifikazio txartela). Horrekin batera, telefono mugikor baten zenbakia eman behar da (bakarra erabiltzaile bakoitzarendako) eta e-posta helbide bat.
Cl@ve erabilita eta Altsasuko Udalaren egoitza elektronikoaren bidez hainbat izapide telematikoki egiteko aukera izanen da, besteak beste: eskabideak aurkeztu; jakinarazpenak jaso; norberaren espedienteen izapidetze egoera ezagutu; ordainagiriak, erroldako datuak, katastroko datuak eta abar kontsultatzea; errolda eta katastro agiriak deskargatu; erreziboak ordaindu eta haien ordainagirien kopiak deskargatu. Beste administrazioetarako sarbidea ematen du ere Cl@avek, eta haietan tramiteak egin daitezke: osasun karpetan sartu, ogasunean tramiteak, lan bizitzaren agiriak eta abar.