Igandean II. Andosilla Traila jokatu zen, Navartrail Nafarroako Koparako baliagarria den proba. Bi ibilbide zeuden aukeran: 19 kilometro eta 800 metroko desnibelekoa, eta 9 km eta 300 metroko desnibelekoa. Dantzaleku Sakana atletismo klubeko korrikalariak bikain aritu ziren.
Proba luzean A4XK taldeko Arruizko Aimar Azpirozek aurrea hartu eta bakarrik heldu zen helmugara (1:28:11), atzetik zetorren Dantzaleku Sakana klubeko Eukeni Goikoetxea altsasuarrari ia bi minutu ateraz (1:30:16). Podiuma klub sakandarreko Jabi Gasanz altsasuarrak osatu zuen (1:33:43), eta Top Tenean klub bereko Asier Ansa altsasuarra sailkatu zen, hamargarren iritsi baitzen helmugara (1:46:09).