Azaroaren 5ean Nafarroako 9 klubetako 80 igerilarik hartu zuten parte Altsasuko Zelandi igerilekuetan jokatutako Nafarroako Kirol Jokoen Kimuen Igeriketa Txapelketako lehen jardunaldian. Sakana Igeriketa Talde arduratu zen guztia antolatzeaz, eta klubeko zortzi igerilarik hartu zuten parte: Nahia Olaiz Aldaz, Unai Fernandez Huarte, Mikel Razquin Cuervo, Aitzol Zelaia Larrea, Oihan Andueza Etxaiz, Ekaitz Berdud Mazkiaran, Luca Tome Lanchares eta Asier Razkin Andueza. 100 metro bularretan eta 400 metro libretan hartu zuten parte. Giro bikaina izan zen txapelketan.
Sakana Igeriketa Taldetik adierazi dutenez, “gure igerilariak primeran aritu ziren, oso denbora onak lortuz”. Olatz Azazeta Pelaez entrenatzailea ere “oso pozik” dago igerilari sakandarrak egindako lanarekin. Gainontzeko taldekideengandik jasotako laguntza eta berotasuna eskertu zuten.