Altsasuko 42. San Silvestrea jokatuko da aurten, Mario Lopezen Memoriala izanen dela, lasterketan hamazazpi urtez gailendu zen korrikalari altsasuarraren omenez. Altsasuko San Silvestrea abenduaren 31n, larunbata, jokatuko da arratsaldez. 18:00etan haurren mailako lasterketak hasiko dira. Ibilbidea aldatu dute eta ez dira Foru plazan bakarrik jokatuko; Gartzia Ximenez kalera ere zabalduko dira. 14 urtera arte ariko dira proba hauetan, aurrebenjamin, benjamin, kmimuak eta haurren maila. Izena ematea egunean bertan egin daiteke, doan.
Helduen proba 19:00etan hasiko da, udaltxearen aurrean. Bost kilometroko ibilbidea osatu beharko dute korrikalariek, ibilbidea trafikoari guzitz itxiko dute 18:45etik 19:45era. Dantzaleku Sakana klubaren webgunean eman daiteke izena abenduaren 30era arte bost eurotan; bazkideek doan. Dantzaleku Sakanak Tritaloi taldearen laguntza izanen du antolakuntzan. June Kintana disko jaurtitzaile bakaikuarra gonbidatu dute.
Bukaeran sari banaketa izanen da, eta zenbait zozketa eginen dituzte ere.