Eusko Alderdi Jeltzaleak, EAJk, 700 hautagai eta 2.500 bat alderdikide eta alderdizale elkartu zituen Barakaldoko BECen igandean. Maiatzaren 28ko udal eta foru hauteskundeetarako hautagai jeltzaleen aurkezpen ekitaldian izan zen hura. Nafarroako ordezkaritzaren bozeramaile gisa Javier Ollo Martinezek, Altsasuko alkateak, hartu zuen hitza. EAJk “Geroa Bairen aldeko apustu irmoa” egin duela azpimarratu zuen, “Altsasun eta Nafarroan zentralitate handia ordezkatzen duen koalizio gisa, Altsasun 2015ean hauteskundeak irabazten eta 2019an zinegotzi kopurua bikoizten asko lagundu zigun”.
Ollok esan zuenez, “Geroa Bai Nafarroan 2015aren aurretik ezagutzen genuen gobernuei alternatiba ahalbidetzeko funtsezko tresna bihurtu da. Geroa Bai indartsua den udal eremuan ere, udal horietan indarra duen tresna politikoa da, aldaketak ahalbidetzen dira”, azpimarratu zuen. Gaineratu zuenez, “zentraltasun horri esker, Altsasun ideologikoki gugan erabat ordezkatuta ez dauden, baina ordezkatzen ditugun ezberdinen esperientzia eta batasun gaitasun horrengatik gugan konfiantza duten pertsonen botoak ere lortu ahal izan ditugu”. Nabarmendu zuenez, “gainerako aukera politikoetatik gehien bereizten gaituen elementua da, eta, Altsasuren kasuan, horrek ahalbidetu digu zortzi urte ematea alkatetzan, eta hori egiten jarraitzeko aurreikuspen oso positiboekin”.
