Nafarroako Gobernuak jakinarazi duenez, maiatzaren 4an jarriko dira martxan Sakanako autobus zerbitzu publiko berriak. Foru administrazioak La Burundesa enpresari eman dio Iruñea eta Gasteiz arteko eta Sakanako bidaiarien garraiorako ardura. Bost urterako eman dio eta horren truke enpresak urtero 159.258,18 euro (BEZ kanpo) jasoko ditu, bost urtetan 848.429 euro (BEZ kanpo).
Autobus zerbitzu berriek garraio bonuak izanen dituzte linea guztietan, eta txartelaren prezioan %50eko deskontua izanen dute. Orain arte, Iruñea-Gasteiz ardatzeko zerbitzu nagusiek baino ez zituzten, eta ez eskariaren araberako zerbitzuak, orain arte garraio publikorik ez zuten herriei zerbitzua ematen zietenak. Gogoratu behar da aurrezteko neurri horren helburua, Estatuak deskontuaren %30 eta Foru Gobernuak gainerako %20a bere gain hartuta, autobus bidezko garraio publikoaren erabilera bultzatzea dela, iraunkorragoa, erregai fosilekiko mendekotasuna murriztea eta herritarren poltsikoa arintzen laguntzea prezioen gorakadaren aurrean.
Kontzesio berria eskualde ikuspegiarekin diseinatu du gobernuak, biztanleek eskualde buruan, Altsasun eta Irurtzunen dauden interes orokorreko zerbitzuetara iristeko dituzten mugikortasun eskaerei erantzuteko, bertatik, gainera, Iruñearekin lotzeko, autobus aldaketa bidez. Zerbitzuak 5 lineatan egituratzen dira: 3 linea Iruña-Gasteiz ardatzean, eta eskarirako zerbitzu bat, Arakil-Irurtzun eta Ergoiena-Altsasu arteko bi lineek osatua. Horren ondorioz, orain arte autobus zerbitzua ez zuten herri txikiagoetara hedatzeko aukera emanen dute linea horiek: Satrustegi, Ekai, Egiarreta, Etxeberri, Urritzola, Errotz, Izurdiaga, Aizkorbe, Lizarraga, Dorrao, Unanu eta Lizarragabengoa. Linea horiek, gainera, zerbitzu nagusiekin lotutako zerbitzuak izanen dituzte, Iruñearekin eta Gasteizekin konektatu ahal izateko.
Eskariaren araberako zerbitzuak midibus batekin emanen dira, eta NBUSen logotipoa duen identifikazio plaka bat erabiliko da. Erabiltzaileek aldez aurretik eskatu behar dute erabiltzeko; beraz, eskaerarik jasotzen ez bada, ez da zerbitzua ematen. Horrela, kasu bakoitzean egiten den ibilbidea egiten diren eskaeren arabera aldatuko da. Foru administrazioak azaldu duenez, eskariaren araberako garraioaren modalitatea dagoeneko garatzen ari dela Nafarroako landa eremu batzuetan, oso balorazio positiboarekin, bai erabiltzaileek, bai udalek.
Ardatz diren lineak Iruña eta Gasteiz lotuko dituzte (1. eta 2. lineak), baita Iruñea eta Ziordia ere (3. linea). Horrela, Iruñea eta Gasteiz arteko konexioak zazpi maiztasun izango ditu egunero, sei larunbatetan eta lau igandeetan. Iruñea eta Ziordia arteko konexioak, gainera, joateko hiru maiztasun eta itzultzeko hiru maiztasun izanen ditu. Gainera, osasun- edo hezkuntza-arrazoiengatik joan-etorriak errazteko, ordutegi jakin batzuetan geldialdiak antolatuko dira ospitale-ingurunean, baita Nafarroako Unibertsitate Publikoaren campusean ere.
Bisita
Bernardo Ziriza Perez Lurralde Kohesiorako kontseilaria Sunsundeguin egon da gaur. Enpresa altsasuarrak Iruñea-Gasteiz artean zerbitzua emanen duten lau autobus egin ditu. Hiru autobus eta midibus bat dira, 63 eta 16 plazakoak, hurrenez hurren. Horiek guztiek, gainera, plaza gehigarri bat izango dute gurpil aulkian mugitzeko arazoak dituzten pertsonentzat, eta halako bigarren plaza bat gehitu daiteke.
Maiatzean martxan jarriko diren ibilgailu berriek irisgarritasuna hobetuko dute, segurtasun aktiboa eta pasiboa, ingurumen eraginkortasuna (EURO VI motorrak, emisio kutsatzaile gutxiago) eta erosotasuna (espazioen handitzea, WiFi sarea, besaulkietako USB konexioak, eserlekuetako erosotasuna), jasangarritasunean, irisgarritasunean eta babesean abangoardian jartzen dituena. Guztiak, gainera, zuri gorriz margotuta daude, eta Nafarroako armarria eta NBUSen logoa daramate, foru administrazioak sustatutako autobus zerbitzu publikoak identifikatu eta ezagutarazteko.