Iragan uztailaren 1ean eta 2an, Espainiako TREC txapelketa egin zen Tordesillasen, Valladoliden, eta Mikel Zufiaurre altsasuarra izan zen junior kategoriako garailea. Mairulegorreta zaldiaren gainean 311 puntu eskuratu zituen, ondoko zaldikoari zortzi puntuko aldea aterata.
Bakarkako erakustaldiez gain, taldeka ere lehiatu ziren kirolariak, eta Nafarroako delegazioak emaitza onak lortu zituen. Zilarra eraman zuten 4 Izar Kategorian: Vanessa Bravok (Napa Valley), Jose Romerok (Verbena), Manuel Ortizek (Legend DW) eta Marina Zapatak (Friso) gogor borrokatuta lortu zuten bigarren postua, Gaztela Lehoi eta EAEko taldeekin lehia estua izan ostean.
Izar bateko Junior kategorian, brontzea eskuratu zuen nafar taldeak: Uxue Rodriguez (Leonidas Polvorillo), Nahia Zubiri (Helios de Lagarde), Aniana Romera (Fire Dancer), Paula Molano (Triunfo de Janas) eta Mikel Zufiaurre aritu ziren. Hala, bi domina lortu zituen altsasuarrak txapelketa horretan.