Nafarroako Gobernuak, Nafarroako Berdintasunerako Institutuaren (NABI) bitartez, 2023-2024 aldian emakumeen eta gizonen arteko berdintasun-ekimenak garatzeko deialdia ebatzi du. Aurkeztutako eskabideen balorazio teknikoa egin ondoren eta deialdian ezarrita zegoen bezala, hasieran aurreikusitako 270.545 euroko partida 385.000 eurora arte handitu zuen NABIk, %34,5. Diru poltsa horren %6,21 ibarreko bi erakundek jasoko dute: Sakanako Mankomunitateak 7.500 euro eta Altsasuko Udalak 16.428,72 euro. Horretaz aparte, Cederna-Garalurrek beste 2.722 euro jaso ditu, helburu berarekin Nafarroako Mendialdean proiektuak lantzeko.
NABIk toki-erakundeekin lankidetzan lehenetsi dituen inbertsio-arloetako batzuk honakoak dira: tokiko gobernantzan genero-ikuspegia zeharka aplikatzeko ekintzak, emakumeen kontrako indarkeriaren aurkako borroka, zaintza-lanak hobeto banatzea, erantzunkidetasuna eta kontziliazioa sustatzea eta emakumeak ahalduntzea, partaidetza soziopolitikoa eta balio-aldaketak.