Altsasuk Preferente mailako 34. eta azken jardunaldian Iruntxiki taldea hartu zuen Dantzalekun. Preferente mailari eustea zuen jokoan talde gorritxoak, eta, horretarako, irabazteaz gain, arerio zuzenen emaitzen zain geratzen zen Altsasu.
2 punturengatik
Partida berehala bideratu zuen Altsasuk. Imanol Lobok eta Gorka Rubiok 2-0 aurreratu zuten Altsasu lehen zatian, eta bigarren zatian gol festak jarraitu zuen, atzera ere Gorka Rubiok eta Julen Floresek sartutako golekin. Azkenean, etxean 4-1 irabazita despeditu zuen denboraldia Altsasuk, baina garaipen garratza izan zen, arerio zuzenen emaitzek ez baitzioten mesederik egin eta hamalaugarren sailkatu delako Altsasu (43 puntu), hamahirugarren salbazio postutik 2 puntu eskasera.
Penatuta
Pena handia da Altsasun. 2021/2022 urtean lortu zuen Altsasuk Preferentera igotzea, 30 urte erregionalean jokatu eta gero. Pozak gutxi iraun du, bi denboraldi bakarrik, 2024/2025 denboraldian Altsasuk erregionalean jokatuko duelako. Etxarri Aranatzek igoera fasean lortzen duenaren baitan, momentuz Lakuntzako Lagun Artea taldea izango du bidaide.
Burlades B ligako txapelduna mailaz igoko da, Ilunberri bigarrenak eta Gazte Berriak hirugarrenak igoera fasea jokatuko dute, eta Altsasu, Lezkairu, Infanzones, Iruntxiki eta Aurrera erregional mailara jaitsiko dira.