Sunsundeguiko enpresa batzordeak deituta, makina bat langilek Nafarroako Parlamentuaren aurrean kontzentrazioa egin zuten atzo. Bilkura Sunsundeguirendako etorkizuna nahi dugu lelopean egin zen. Oscar Tellecheak (LAB) azaldu zuenez, kontzentrazioaren helburua zen "lantegiaren, Sunsundegiren eta Sakanaren etorkizuna aldarrikatzea da. Garrantzitsua da industria plan serio bat izatea, fabrikaren eta ibarraren etorkizunerako. Eta aurrera egiteko balio duen plana izan dadila, eta ez dezagun ikusi azken hamalau urte hauetan ikusi behar izan duguna".
CCOO, ELA eta LABeko ordezkariak Parlamentuko sarreran.
Hiru sindikaturen eskaerak
Enpresa batzordean gehiengoa duten CCOO (hiru delegatu), ELA (bi delegatu)eta LAB (hiru delegatu) sindikatuek ikerketa batzorde bat sortzea eskatu dute Nafarroako Parlamentuan, "14 urte hauetan gertatu den guztia ikertzeko, Sunsundegui enpresaren zuzendariak egin duen kudeaketa txarraren ondorioz", esan zuen Telletxeak hiru sindikatuen izenean.
Telletxeak gaineratu zuenez, "Nafarroako Gobernuak, Sodenak, 34 milioi euroko zorra barkatu zuen 2013an, eta enpresak jarraitzeko balio izan zuen. Funtzionatu ez duen enpresa eredu bat egin zen, etengabe Nafarroako Gobernuaren laguntzak eskatzen aritu den enpresa bat izan da, eta horrek ez du ezertarako balio izan plantillaren aberasteko, plantilla asko galdu baitu: soldata jaitsierak, soldata izozteak eta kaleratzeak", adierazi zuen.
Gaineratu zuenez, "egoerak inguruko hornitzaileak ere zipriztindu ditu". Horregatik guztiagatik, "industria plan serio bat eta lantegiari etorkizuna emango diona" eskatu zuen. "Horretarako, inplikatutako eragile guztiak interpelatzen ditugu, hala nola Nafarroako Gobernua, Sodena, Administrazio Kontseilua eta Sunsundegirendako irtenbide ona, etorkizunekoa eta iraunkorra bilatzeko inplikatuta dauden eragile guztiak", azpimarratu zuen.
Enpresa batzordeko kide batzuk pankartari eusten. David Trebejo eskuinetik bigarrena.
Laugarren sindikatua
Enpresa Batzordeko presidente eta UGTko (bost delegatu)kide David Trebejok azpimarratu zuen bere sindikatuak dokumentu bat erregistratu duela Legebiltzarrean: "2013tik hona gertatutakoaren historia txiki bat egiten dugu". Bertan, "Gobernuak barkatu zuen zorra" aipatzen da, "nahiko kopuru handikoa". Trevejok azaldu zuenez, "hortik aurrera, Sunsundegiko langileak, ahalegin handiekin, lanean hasi ginen, eta gutxieneko errentagarritasuna lortu genuen 2015etik 2020ra arte. Une hartan zor txikixeagoa zegoen, lau milioikoa, eta gauzak nahiko onargarriak ziren konpainiarendako. Hortik aurrera, Covid-19aren arazoa sortu zen, eta lan kargaren inertzia beragatik, 2020an urtea gainditzeko aukera izan genuen, baina 2021ean eragin handia izaten hasi zen", azaldu zuen.
Adierazi zuenez, "zaila izan zen" aldi baterako lan erregulazioko espedientean zegoen enpresa bat errentagarri bihurtzea "gutxieneko finantza gihar batekin". "Sunsundegi gutxieneko finantza gihar batekin utzi zitzaigun 2013an. Ez genuen horrelako gauzak jasan ahal izateko dirurik kutxan, eta hor hasi ziren galerak", adierazi zuen. Gaineratu zuenez, "ekoizpena igota zuzentzen saiatu ziren, baina ez zen lortu, materialak erosteko arazoak zeudelako". Trevejok adierazi zuenez, "zalantza gero eta handiagoa izan zen, 2024ra arte, Sunsundegirendako oso interesgarriak ziren proiektu batzuk lortu zirenean, Volvorekin eta B&Drekin, eta, arrazoiren batengatik, 2024ko bigarren seihilekotik aurrera lausotzen joan zirela", adierazi zuen.
Ildo horretan, "Volvorekin harremanak berriro hasteko" eskatu du, "Sunsundegirendako guztiz ezinbestekoa zen bezeroa baitzen, eta hala izaten jarraitzen du", eta foru parlamentariei "gogor lan egiteko" eskatu zien, "Sunsundegirendako bazkide inbertitzaile bat bilatzeko proaktibitate handia".
UGTko kideak ziurtatu zuenez, "Sunsundegik etorkizuna du. Sunsundegik erakutsi du lan karga eta etorkizuna duela. Eta hor daude 2007tik 2020ra arteko emaitzak, irabaziak izan ditugu. Gertatzen dena da, gero, ez daukagun finantza muskuluaren eta materialik ezaren kontura, azkenean ezin izan diogula buelta eman. Baina enpresa bideragarria da, plantilla erabat gaitua eta prestatuta dago energia berriko edozein motatako proiektu berri, elektrikoetarako", azpimarratu zuen.
Parlamentuan aurkeztutako idatzian UGTk adierazi du Sunsundeguiko zuzendaritzak aurtengo emaitzei buruz emandako azken informazioak hamabi milioi euroko galerak aurreikusten dituela. Zenbaki gorri horiek "enpresaren historiako handienak dira, bi unitate baino gehiago fabrikatzeko eskaera nahikoa dagoen urte batean", zehaztu du.
Gainerako sindikatuek eskatzen duten ikerketa batzordeari dagokionez, "gu ez gaude kontra", azpimarratu zuen. "Norbaitek salaketa jartzen badu eta irregulartasunak badaude, gu ez gaude Parlamentuak edo dena delakoak ikerketak irekitzearen kontra, baina uste dugu zerbaiten zantzuak badaude salatu egin behar dela, eta, hala badagokio, hor egongo gara gu ere erantzukizunak eskatzeko", adierazi zuen. Trebejok gaineratu zuen enpresaren ekonomia kontuak “munduan ospe handiko ikuskaritza enpresa batek (KPMG) ikuskatu ditu eta bazkideen batzar nagusian onartu dira urtero”.
Bilkura Altsasun
Langileen talde batek sustatuta, azoka egunean bilkurak egiten hasi ziren joan zen astean. Bigarren deialdian, atzo, 50 bat pertsona elkartu ziren. Bilkura horiek asteazkenetan, 11:00etan, egiten ari dira, estalpearen parean eta etorkizuna Sunsundeguirendako eta Sakanarendako leloa dute. Gaur, 19:30ean, udaletxe parean kontzentrazioa deitu dute.