Altsasu Kirol Elkarteak udarako II. Futbol Campusa antolatu du Dantzalekun. Uztailean izango da, bi txandatan. Lehena uztailaren 1etik 15era izango da, eta 2009tik 2013ra bitartean jaiotakoek eman dezakete izena. Bigarrena uztailaren 16an hasi eta 31n despedituko da, eta 2014tik 2018ra bitartean jaiotako neska-mutilendako izango da.
Ordutegi bera izango dute bi txandek, 9:00etatik 14:00etara. Entrenamendu tekniko-taktikoak, joko kooperatiboak, partidatxoak eta igerilekuan gozatzeko tartea izango dute. Izena ematea zabalik dago ekainaren 1a baino lehen. Bazkideek 160 euro ordaindu beharko dituzte eta bazkide ez direnek 190 euro. Izena ematen duen bakoitzak kamiseta gorria eta urdina eta ura edateko botila jasoko ditu. Informazio gehiago: 624 648 790.