Konkurtso administrazioak, Molins eta Andres abokatu bulegoak, Sunsundeguiri buruzko txosten teknikoa aurkeztu zuen Iruñeko Merkataritza arloko 1 zenbakidun Epaitegian martxoaren 22an. Hura aztertu eta lehiaketari buruzko erabakia hartuko du epaileak. Berrehun orri eta zazpi anexo ditu. Agiri horretan, besteak beste, daude: konpainiaren egoera ebaluazioa, azken hilabeteetan hartu diren euste neurriak, jarraipena emanen duen industria proposamenik baden eta aukera onena zein den adierazten duten ondorioak.
Eskaintza idatzirik ez dagoenez, txostengileek Altsasuko lantegia likidatu eta langileen kontratu guztiak eten beharko lirateke ondorioztatu dute. Txostena behin-behinekoa da eta alegazioak aurkezteko hamabost eguneko epea dago orain. Baina berririk ez badago, Sunsundegui likidatu eta langileak kaleratuko lituzkete. Inbertitzailearen eskaintza idatzi lotesle bat aurkezteak guztia aldatuko luke.
Harremanen nondik norakoa
Txostengileek azaldu dutenez, hamazazpi enpresek azaldu zuten Sunsundegui eskuratzeko interesa. Baina guztien artean Belgikako Dumarey taldea nabarmentzen da. Nafarroako Gobernuaren Sodena sozietatearekin garagarrilean jarri zen harremanetan. Eskaintza bat egitea espero zuten, baina ez zen ezer iritsi eta azaroaren lastailaren 11n hartzekodunen konkurtsoa indarrean sartu zen Sunsundeguin. UGTko idazkari nagusi Lorenzo Riosek konkurtso administratzaileei Dumareyren interesaren berri eman zien eta ilbeltzaren 2an elkartu ziren. Konkurtso administratzaileek enpresa handi bat zela kontutan hartuta, aintzat hartu zuten haren interesa, eta eskaintza bat "garaiz" aurkezteko eta langileen egoera kontuan izateko eskatu zioten.
Dumarey taldearekin harremanak azken hiru hilabeteetan areagotu dira. Besteak beste honakoen inguruan eskatu izan du informazioa: fabrikaren zoruaren kutsadura, lantegiaren instalazioen ekonomia balorazioa, amiantoaren kalteengatik erreklamazioak (hiru), hornitzaileei buruzkoak eta haiekin lan egiteko aukerari buruzkoak.
Enpresak hasieratik Nafarroako Gobernuari eta Sodenari finantzaketarako laguntza eskatu die. Horretarako industria eta negozio plan bana aurkeztu behar zuela esan zioten administratzaileek. Ilbeltza akaberarako egiteko konpromisoa hartu zuen. Eta adierazi zuen Volvo eta Mayersekin konpromisoa lortu zuela Sunsundeguiri eskaerak egiten segitzeko. Dumarey taldeak orain arte aurkeztu duen bakarra loteslea ez den proposamen bat da, 3,5 milioi eurokoa. Sunsundeguiren lantegiak 27,3 milioi euro balio ditu. Eta bere zorra 50 milioi euro baino gehiagokoa da. Dumareyk zorrik gabe hastea proposatu zuen. Aurtengoa autobusak ekoizten eta bezeroekin eta hornitzaileekin harremanetan jartzeko urtea litzateke. 250 langilerekin hastea zuen buruan, baina lanera progresiboki sartuko lirateke. 2026rako eskaera gehiago jaso eta autobus hibridoak eraikitzeko proposamena zirriborratu zuen.
Dumareyrekin azken harremana martxoaren 6an izan zela azaldu dute txostengileek. Oraindik ez zuen esandakoa bete. Horregatik, txostengileek Altsasuko lantegia likidatu eta langileen kontratu guztiak eten beharko lirateke ondorioztatu dute. Txostena behin-behinekoa da eta alegazioak aurkezteko epea zabalduko da orain. Baina berririk ez badago, Sunsundegui likidatu eginen dute.
Talde belgikarreko ordezkariak UGT, LAB eta CCOOko ordezkariekin batzartu zen martxo hasieran. Agenda kontuengatik, ELArekin biltzekoak dira.
Batzarra
Gaur egun Sunsundeguin 341 langile daude eta aldi baterako enplegu erregulazio espedientea indarrean dute apirilera arte. Hura hornitzen duten enpresetan beste 150 bat langile daude. Sunsundeguiko langileak batzarrera deitu zituzten LABek, CCOOk eta ELAk asteazkenean. UGTk ez zuen deialdiarekin bat egin. Enpresa batzordeko gehiengoak erabaki du hiruko mahai bat osatzeko proposamena egitea. Hartan, haietaz aparte, Dumarey taldeko eta Nafarroako Gobernuko-Sodenako ordezkariak egonen lirateke. Mahai horretan egoera aztertu eta proposamen idatzirik ez aurkezteko egon litezkeen arazoez edo zalantzez hizketatzea nahi lukete hiru sindikatuetako ordezkariek.
Bilkura jendetsua izan zen langileena. Egoerak jota daude batzuk, haserre besteak. Etsita daudenak egoera lehenbailehen bukatzea nahi dute. Enplegu erregulazio espedientea apirilaren 30ean bukatuko da. Enpresa batzordeko gehiengoak uste du oraindik badela enpresa zabalik mantentzeko aukerarik. Horretarako, mugitu eta beharrezko ateak jotzeko prest daude.