Futbola

Altsasu, preferente mailako txapelduna!

Guaixe 2025ko api. 1a, 12:42

Emakumezkoen preferente mailako liga irabazi dute altsasuarrek, Gazte Berriak bigarrenari 9 puntu aterata. Aurki kopan murgilduko dira

Asteburuan emakumezkoen preferente mailako 22. jardunaldia jokatu zen, ligako azkena. Altsasu liderrak Burlades hartu zuen eta bi taldeek partida borrokatua izan zuten. Burlades izan zen markagailuan aurreratu zena, baina Sonia Alonsok bana berdindu, eta lehiak estu-estu jarraitu zuen bigarren zatiko bukaerara arte. 80. minutuan Maddi Mariñelarenak Altsasuren bigarren gola sartu zuen, eta luzapenean, 94. minutuan Ainhoa Agirrek hirugarrena. 3-1 irabazita eta urte luzez Altsasuko jokalari den Maalen Berazari omenalditxoa eginda despeditu zuen liga Altsasuk, liga erraz irabazita. 

Izan ere Altsasuk ez du partidarik galdu. Jokatutako 20 partidetatik 17 irabazi ditu eta 3 berdindu. 54 punturekin, Gazte Berriak Antsoain bigarrenari 9 puntu atera dizkio (45 puntu). 

Liga bukatuta, aurki kopari ekingo dio Altsasuk.