Gizonezkoen bigarren mailako azken jardunaldian, Altsasuko CBASK taldeak Noain liderraren kontra jokatu zuen. Partida oso lehiatu eta borrokatuan, erdialdetik aurrera alde txikia hartu zuen CBASK-ek, bukaerara arte mantendu zuena. Azkenean, 10 tantoren aldearengatik gailendu zen CBASK, 94-104. Aimar Azpiroz izan zen jokalari nabarmenena, 30 puntu sartu baitzituen.
Noain da gizonezkoen bigarren mailako liderra (15 puntu), partida guztiak irabazita, CBASK-ekoa izan ezik. CBASK sailkapenean zortzigarren da, partida bat gutxiagorekin. Azken hiru partidak irabazi ditu, eta bolada ona du. Hamargarren jardunaldian CBASK-ek sailkapenean hamargarren eta arerio zuzena den Mendillori Egues izango du aurkari abenduaren 13an, 18:00etan, Olaz kiroldegian.
Emakumezkoek jardunaldi bikoitza
Emakumezkoen lehen senior mailan, bederatzigarren jardunaldian CBASK-ek Noain A taldea hartu zuen azaroaren 29an Zelandin. Lehia bizi-bizi hasi zen, baina berehala talde altsasuarrak aldea hartu zuen eta bukaerara arte tarteari eutsi zion eta azkenean eroso irabazi zuen, 75-60. CBASK-eko Ainhoa Etxaizek lortu zituen puntu gehien, 20 puntu.
Gauzak horrela, Liceo Monjardin da emakumezkoen lehen senior mailako liderra (16 puntu). CBASK laugarren da (14 puntu). Hamargarren jardunaldian CBASK-ek Payvi taberna Sanduzelai izango du aurkari abenduaren 13an, 17:15ean, Sanduzelain. Eta hurrengo egunean, abenduaren 14an, bigarren jardunaldian atzeratutako partida jokatuko du CBASK-ek. Talde altsasuarrak Navarro Villoslada A hartuko du Zelandin, 12:00etan.