Mutilen preferente mailako lehen multzoan 22. jardunaldia jokatu zen. Altsasuk Mutilvera B taldearen kontra partida oso borrokatua jokatu zuen Arangurenen. Hasi eta berehala, lehen minutuan, Julen Floresek Altsasu aurreratu zuen. Atsedenaldira aurreratuta joango zirela zirudienean, lehen zatiko luzapenean Mutilvera B-k bana berdindu zuen. Bigarren zatian bi taldeek gogor borrokatu zuten garaipenagatik. 76. minutuan Mikel Etxaizek areatik kanpo egindako jaurtiketa ikusgarriarekin 1-2 aurreratu zuen Altsasu. Gorritxoek ongi eutsi zuten, eta 3 puntuak Altsasura ekarri zituzten.
Azken jardunaldian irabazi eta gero, San Jorgek jarraitzen du preferente mailako lider (44 puntu), Amigo taldea 4 puntura duela (40 puntu). Altsasuk hirugarren segitzen du, igoera faseko postuetan (39 puntu). 23. jardunaldian Altsasuk San Jorge liderra hartuko du. Partida erabakigarria martxoaren 14an, 18:45ean, Dantzalekun jokatuko da.