Langileen Egunerako LAB sindikatuak Langileok eragin leloa aukeratu du, eta 12:00etan manifestazioa deitu du Altsasuko Foru plazatik abiatuta. Egun horretan lau aldarrikapen zabaldu nahi dituzte. Aurrena, 1.500 euroko gutxieneko soldata eta pentsio duina denondako, bizitzaren garestitzeari aurre egiteko. Aldi berean, arrakala matxista, arrazista, eta belaunaldi arrakalarik ez egotea aldarrikatuko du. Hurrena zerbitzu publikoak sendotzeko aldarrikapena da, hezkuntza, osasuna edota zaintza eskubidea bermatzeko. Horiekin batera, etxebizitzaren gaineko espekulazioarekin bukatzeko eskatuko du LABek. Zabalduko duen atzeneko aldarrikapena industrian trantsizio ekosoziala bideratzea eta enplegua defendatzea izanen da.
Gutxieneko soldata aldarrikatzeko martxoaren 17an deitutako greba orokorraren ondoren heldu da Langileen Eguna. LABeko kideek uste dute egun hartan "langileon ahotsa entzunarazi genuen, patronal eta instituzioen aurrean indar posizio hobean egotea lortuz eta gutxieneko soldata negoziazio kolektiboaren bidez hobetzeko bideari bulkada eman genion". LABeko ordezkarien iritziz, "CENek, CCOOk eta UGTk Nafarroan gutxieneko soldata propioa negoziatzeari betoa jarri diote, grebaren osteko negoziazio mahaiei uko eginez". Aldarrikapena Nafarroako Parlamentuan gutxigatik ez zuela aurrera egin gogoratu ondoren, EH Bilduk, ERCk eta BNGk aldarrikapena Espainiako Kongresura eramateko asmoa dutela nabarmendu dute.
Munduari erreparatzean LAB sindikatuko kideek "zanpaketa eta gerra" ikusten dituzte nonahi: Palestina, Venezuela, Kuba, Groenlandia, Libano, Iran… Zein izango da hurrengoa? Trump eta Netanyahu bezalako faxistek eta genozidek jo puntuan dituzte munduko herriak eta langileak". LABeko kideek salatu dutenez, "euren menpe jarri dira Europako agintari gehienak. Mozorrorik gabe azaltzen zaigu kapitalismoa: sistema bortitza, koloniala, heteropatriarkala da".
Horren aurrean, "antolakuntza eta borroka kolektiboaren bidez posible da munduan, Europan eta, bereziki, Euskal Herrian beste eredu bat eraikitzea". Eta gerraren kontrako aldarria zabaldu du. "Gutxi batzuen etekinak baino, denon bizitzak erdigunean jarriko dituen ereduaren alde borrokatzen ari gara. Birbanaketa politikak aldarrikatzen ditugu; enplegua, zaintza lanak eta ondasuna banatzea", azpimarratu dute.