Altsasuk Izar Berriak Gazteen Binakako Aizkora Txapelketako lehen finalerdia hartu zuen larunbatean. Hiru bikote lehiatu ziren, finalerako bi txartelen bila: Oier Mitxelena eta Jakes Izeta V, Aritz eta Eñaut Oiarbide eta Unai Osinalde eta Unai Romairone.
Zutikako lanean Mitxelena eta Izeta V.ak moztu zuten azkarren enborra (1:57), Oiarbidetarren (1:58) eta Osinalde-Romaironeren (2:17) aurretik. Kolpekako lanean Oiarbidetarrak izan ziren azkarrenak (45 kolpe), Osinalde-Romaironeren (48 kolpe) eta Mitxelena-Izeta V-aren (59 kolpe) aurretik. Baina lan luzeetan Osinalde-Romaironek hartu zuten aurrea (14:03), Mitxelena-Izeta V-aren (14:14) aurretik. Oiarbidetarrak ez ziren horren fin ibili (17:27).
Gauzak horrela eta lan guztiak banatuta, Osinalde-Romaironek (17:08) eta Mitxelena-Izeta V.ak (17:10) lortu zuten final handirako txartela. Aldiz, Aritz eta Eñaut Oiarbide txapelketatik kanpo geratu ziren (20:10).
Izar Berriak txapelketaz gain, Emakumeen Binakako Aizkora Txapelketaren laugarren jardunaldia jokatu zen Altsasun. Lan luzeetan, Uxue Ansorregi eta Maika Ariztegi alde handiz gailendu ziren (13:58) Irati Astondoaren eta Ainize Perezen aurretik (18:17). Bukatzeko, Lierni Osa harri jasotzaileak erakustaldi ederra egin zuen.
Goikoetxea-Erdozia, Urnietan
Izar Berriak txapelketaren bigarren finalerdia maiatzaren erdialdean jokatuko da, Urnietan. Ioan Goikoetxea-Jon Erdozia, Jon Zaldua III.-Joanes Izagirre Ipiña eta Igoin Pikabea-Mikel Santesteban bikoteak lehiatuko dira, finalerako bi txartelen bila.