Altsasu Kirol Elkarteak Emakumeen Areto Futboleko 12 orduak torneoa antolatu du ekainaren 20rako Zelandin. Zazpi taldek eman dute izena: Crudo Golderia, Mimica Caipirinha, Txinorri, Sinfu, Mendialdea, Salburua eta Agurain.
Goizean hasiko dira 12 orduak. 9:30ean jarriko da martxan lehen fasea, eta bertan talde guztiek elkarren kontra jokatuko dute, 17:50ak arte. Partidak 20 minutukoak izango dira, atsedenik gabe, eta partida eta partida artean 5 minutuko atsedena egingo da. Lehen lau taldeak 18:15ean hasiko diren finalerdietarako sailkatuko dira, eta 19:20ean final handiaren txanda izango da. Sari ematea 20:00ak alderako iragarri dute.
Txapeldunak 450 euro eta trofeoa lortuko ditu, bigarrenak 130 euro eta trofeoa eta, horretaz gain, jokalari eta atezain onenendako saria izango da.