Altsasuko Udalak Bakea kaleko berrurbanizazio lanak emateko deialdia egin du. Lanek 458.944,90 euroko (BEZik gabe) kostua dute. Obra egin nahi duenak bere eskaintza lastailaren 23ko 23:59rako aurkeztu beharko du. Kontratua eskuratzen duen enpresak sei hilabete izanen ditu obrak despeditzeko.
Zehazki honako lanak eginen dituzte: ur-hornidurako sarea berritzea, dagozkion hartuneak eta elementu osagarriak jarriz; ur beltzen saneamendu-sarea berritzea, kolektoreak, erregistro-putzuak eta hartuneak eginez; euri-uren saneamendu-sarea berritzea; argiteria publikoko sareari dagozkion kanalizazioak egitea; energia elektrikoa hornitzeko kanalizazioak gauzatzea; telekomunikazioetarako kanalizazioak gauzatzea; gainazaleko zoladura eta urbanizazioa berritzea eta egokitzea eta obrek ukitutako gainerako zerbitzuak egokitu, babestu edo berrezartzea. Guztira 1.928 metro karratuko azalera berrituko da.