Arakilgo Udalak zerbitzu anitzeko brigadarako langabetuak kontratatzeko deialdia egin du. Hautatuak diren pertsonak peoi plazak beteko dituzte. Kontratatuko den pertsonen kopurua zerbitzuaren beharren arabera izango da. Kontratuen iraupena 3 hilabetekoa edo 6 hilabetekoa izanen da, beti ere, zerbitzuaren beharren arabera. Kontratutakoen ordainsaria E mailari dagokiona izanen da. Deialdian interesa duenak Nafar Lansaren, Nafarroako Enplegu Zerbitzuan, langabetu bezala agertu behar da. Parte hartzeko eskaerak udaletxean aurkeztu beharko dira garagarrilaren 2 baino lehen.
Kontratatutako egitekoen artean izanen dira, besteak beste: udal eraikinak mantendu eta zaintzea; udal zerbitzuak mantendu eta zaintzea (urak, saneamendua, hornikuntza, ihesen konponketa, eta abar); kisusgile eta lorezaintza lanak, arekak eta errekak garbitzea, bideak txukuntzea; basozaintza lanak, besteak beste, sastraka kentzea eta baso aprobetxamenduak markatzea edo eska dakizkiekeen antzeko beste lan batzuk.