Herriak du hitza. AHTrik ez! leloarekin, AHT Gelditu! Elkarlanak deituta bihar, 19:00etan, manifestazioa eginen da Arbizun. Abiadura Handiko Trenaren (AHT) egitasmoaren kontra azaltzearekin batera, biharko manifestazioarekin antolatzaileek ere, "informazioa, erabaki ahalmena eta errespetua" eskatuko dituzte. Jakina denez, AHT Gelditu! Elkarlanak deituta herri galdeketak egitekoak dira maiatzaren 10ean Lizarragabengoan eta maiatzaren 17an Arbizun. Elkarlaneko kideek galdeketen antolaketaren berri eman zutenean azaldu zutenez, "Nafar Gobernutik ukatzen den informazioa eta eztabaida eskubidea defenditzen dugu". Horrekin batera, salatu zuten "AHT bultzatzen ari diren instituzio ezberdinek herritarrekin, herriekin eta kontzejuekin kontatu gabe bultzatzen" ari direla egitasmoa. Horregatik, "herritarren iritzia entzun eta errespetatu dadin" sustatu zuen AHT Gelditu! Elkarlanak herri galdeketei babesa emateko sinadura bilketa. 316 arbizuarren eta lixarrengotarren sinadurak bildu zituzten. Bateko udalak eta besteko kontzejuak galdeketak babestuko dituztela aurreratu dute.