Arbizuko Gazte Asanbladak (AGA) antolatuta Gazte eguna ospatuko da bihar. Baina horren atariko, gaur ere izanen dira ekitaldiak. 17:30ean haurrendako film emanaldia iragarri dute AGAkoek. Hura despeditutakoan, 18:30ean, txokolate-jana izanen da. Eta 20:30etik aurrera Argi Bidea elkarteak ateak zabalduko ditu, pintxo-poterako.
Biharko Gazte eguna abiarazteko 10:30ean gosaria izanen da. Majo gosalduta, 11:30ean, Kolonbiako egoerari buruzko hitzaldia izanen da. Hura despedituta biri-biri txapelketako final-erdiak eta finalak jokatuko dira 13:00etatik aurrera. Lehiaketa horretan bi bikote neurtzen dira eta bikote bakoitzak behin ukitu dezakete baloia, aurkariak egin aurretik. Bazkaltzeko garaia 14:30ean iritsiko zaie. Eta mahaiaren inguruan eserita daudela Ainhoa Galain bakarlariak kontzertua emanen du 16:00etan. 17:00etan, berriz, koktel lehiaketa antolatu dute AGAkoek. Festa giroan aldarrikapenerako tartea ere aurreikusi dute, 20:00etako kalejirarekin. Afaltzeko ogitartekoak izanen dira 21:00etan eta 23:30etik aurrera Sustrai Berriak eta Soka Lepoan taldeen kontzertuak izanen dira.