Orain arteko Binakako Txapelketako estuenean, guztia dago erabakitzeko. Sailkapeneko behealdean hiru bikote daude launa puntura berdinduta. Joseba Ezkurdia eta Xabier Tolosa dira horietako bat, sailkapenean seigarren. Larunbatean, Zallan, Mikel Urrutikoetxeari eta Aitor Arangureni irabazten badiete, zuzenean sailkatuko dira finalerdietako play-offetarako. Zallara bidean harrapatu ditugu.
Zallan irabaziz gero, Binakako finalerdietako play-offetara.
Joseba: Horrela ikusita erraza ematen du: larunbatean irabazi eta listo, lanak eginda. Baina zailena irabaztea da. Partida zaila dugu eta ea zer gertatzen den, baina egia da azkeneko astetan gure joko maila igo dela, hobeto ari gara eta borroka horretan sartu gara. Txapelketa hasieran hau nahi genuen, azkeneko partidara bizirik ailegatzea, gure esku iristea, eta pozik gaude.
Txapelketako lehendabiziko txanpan emaitzek ez zuten laguntzen. Zu ere ez zeunden zure onenean. Bikote gisa ahalmena zenuten, baina zer gertatzen zitzaizuen?
J.: Hasieran ez genuela gure maila eman. Aurreneko itzulia puntu batekin bukatu genuen eta gauzak oso zail ikusten ziren. Ez geunden momenturik hoberenean; ni ez nenbilen guztiz gustura. Gero hobeki hasi ginen jokatzen, eta gure maila hobetzen hasi zen. Bigarren itzulian Zabaletaren kontra partida ona jokatu genuen Labriten, Altunaren kontra irabazi genuen Labriten eta Peñaren kontra gailendu ginen Labriten. Puntu horiek oso garrantzitsuak izan ziren, eta zer esanik ez larunbatean Jakaren eta Mariezkurrenaren kontra Labriten lortutako azkeneko puntua, bete betean play-offetarako borrokan sartu gintuena. Bigarren itzulian partida onak egin ditugu eta galdutakoetan ere ongi lehiatu ginen. Sentsazioak onak dira eta horri eutsi diogu. Horregatik gaude bizirik.
"Jakaren eta Mariezkurrenaren kontra txapelketako partidarik onena egin nuen, azken sasoiko hoberena"
Zer ote du Labritek?
J.: Frontoi oso ona da, bai niretako eta baita Xabirendako ere. Frontoi noblea da, publikoa ere ona, gainean dagoena, eta bertan jokatzea gozamena da. Labriten oso gustura sentitzen naiz, etxean bezala. Niretako frontoirik hoberena da, eta bigarren itzuli honetan frontoiak lagundu digu.
Larunbateko Jakaren eta Mariezkurrenaren kontrako partidan Ezkurdia eta Tolosa onenak ikusi genituela dio katedrak. Hala sentitzen duzu?
J.: Hasieratik pilota gosez nengoen, partida irabazteko amorrazio horrekin, oso kontzentratuta, partidatik inongo momentuan atera gabe, eta sentsazio oso onekin. Partidara motibatuta joan ginen. Ikusten genuen irabaziz gero borrokan sartuta egongo ginela berriz, gure esku zegoela, eta horrek ere laguntzen du. Txapelketako partidarik onena egin nuen, azkenaldian egin dudan hoberenetakoa.
Tolosak errebotetik erantzun zuen pilotakada hura, ikusgarria izan zen. Palara jokatzen ari zinetela zirudien.
J.: Bai, ikusgarria.
Xabier: (Kar, kar…) Kasualitatea izan zen, gutxitan ikusten dira halako jokaldiak. Egia esan zorte pixka bat izan nuen. Jarraian bigarrena etorri zenean ikusi zen hori, bigarrena bueltatzeko ez bainuen gaitasunik izan.
Bigarrena itzuliko bazenu...
X.: Bai, ikaragarria litzateke. Alde horretatik pena, hemendik aurrera ere ikusteko ere politak izaten baitira halako jokaldiak. Berriz ere kostako da halakoren bat ikustea.
Zer moduzkoa da Joseba bikote gisa?
X.: Oso ona. Oso kontentu nago berarekin, kantxan eta kantxatik kanpo ere asko ari baitzait laguntzen. Oso gustura nabil berarekin batetik bestera.
"Nola ibili garen ikusita, azken postuan eta beti sufritzen, play-offetan sartzea sekulako saria litzateke"
Hasieratik nabaritzen zitzaizuen konplizitate hori.
J.: Bai, Xabirekin ongi eramatea erraza da. Baita kantxa barruan ulertzea ere, pilota oso ongi ulertzen duelako. Hasieran ni ez nengoen momenturik onenean, Xabirekin aritzen nintzen lehen txapelketa zen, guztia elkartu zen baina bosgarren jardunalditik hobeto lehiatzen hasi ginen eta pena dugu beste punturen bat gehiago lortzeko aukera izan genuelako. Adibidez, Jakaren kontra gantxo bat lurrera bota nuen 20 berdinekoan... lehen itzulian xehetasun horiek markatu gintuzten.
Larunbatean, ligaxkako azken partidan, Urrutikoetxea eta Aranguren dituzue arerio Zallan. Egoera berdintsuan zaudete, biek launa puntu dituzuelako, baina zuek irabaztetik zatozte, eta beraiek, aldiz, galtzetik. Hori nabarituko da?
J.: Ikusiko da, baina guretako orain arteko benetako finala hau da, larunbateko partida, irabazi beharrekoa. Orain arte egindakoak bizirik jarraitzeko balio izan digu, partida honetara bizirik eta sentsazio onekin iristeko. Zallan partida zaila eta polita dugu jokatzeko, eta buru-belarri gaude partida ongi prestatzen. Gure jokoa ongi egitera aterako gara, eta ea inertziak laguntzen digun. Azkeneko aste hauetan disfrutatzen ari gara, bai entrenamenduetan eta bai partidetan, eta hori da garrantzitsuena, %100 ongi prestatzea, gure eskutan dagoen guztia ongi egitea eta frontoian dena ematea.
Orain artekoa baino presio handiagoa duzue larunbatera begira?
J.: Bai. Azkenean presioa eta nerbio puntu hori handiagoa da. Baina polita da aste guztian barna sentitzen duzun urduritasun puntu hori sentitzea, ona da. Azkenean horretarako gaude, eta hori noizbait sentitzen ez badugu, pilotaren munduan alferrik gaudenaren seinale. Presioari eusten jakin behar da, eta larunbaterako oso gogotsu gaude.
Zein izango da zuen estrategia?
J.: Urrutikoetxea oso momentu onean dago, tantoa erraz bukatzen ari da, ezker gantxoarekin jokoan asko ari da parte hartzen. Aranguren ere txapelketa ona egiten ari da, pilota guztiak erantzun egiten ditu. Euren jokoa alde batera utzita, gu partida serioa egitera aterako gara eta gure jokoan zentratu beharra dugu: nola nahi dugun jokatu, zein jokorekin egin ahal diegun min gehien… gurea egiten saiatu beharra dugu, horrela izango baitugu partida aurrera ateratzeko aukera.
Zallan aritu izan zarete aurretik?
J.: Nik lauzpabost alditan jokatu izan dut, baina Xabierren aurreneko aldia da. Jokatutako partida guztiak irabazi izan ditut, baina ez zait asko-asko ere gustatzen. Lurra lehorra da, pilota azkar gastatzen du eta lurrean botea hartzen du, baina ez da frontoi txarra. Ez dago kexarik. Jokatzeko frontoi ona da, nahiz eta pilotak nahi baino azkarrago gastatu.
Txapelketa ia guztian azkenak izan eta gero play-offetara sailkatzea handia litzateke.
J.: Txapelketa aurkeztu zenean lehen helburua play-offetara sailkatzeko borrokan sartzea zen, eta ikusita txapelketan nola ibili garen, azkeneko postuan eta beti sufritzen... orain sari polita litzateke play-offetan sartu eta partida bakarrean erabakitzea finalerdietara sartuko garen ala ez.
X.: Bai, ikusita txapelketa guztia nola joan den izugarria litzateke, baina orain larunbateko partidan zentratu beharra dugu, hori irabazi gabe ez baitago play-offik. Larunbaterako ahal den hobekien prestatu eta ea irabazita klasifikatzeko aukera dugun.
Txapelketa ederra izaten ari da. Emozioak azkenera arte iraungo du, ligaxkako azkeneko jardunaldian, asteburu honetan erabakiko baita guztia. Pilotazaleendako gozamen hutsa da, baina zuendako?
J.: Txapelketa oso polita izaten ari da, formatua aldatu zutenetik nik uste sekula ez dela gertatu azken jardunaldian guztia erabakitzeke egotea. Polita da publikoarendako, jendearendako eta baita guretako ere, astero beti zerbait dagoelako jokoan eta horrek astea beste modu batean pasatzera derrigortzen dizulako. Eskertzen da txapelketan emozioa pil-pilean egotea.
Sailkapeneko goi aldera begira, zuen ustez zein bi biko sailkatuko dira zuzenean finalerdietarako?
J.: Askotan ez dut asmatzen, baina nik uste aurten bi lehenak Altuna-Martija eta Irribarria-Rezusta izango direla eta eurak pasako direla zuzenean.
X.: Ez dakit oso ongi nola dauden konbinazio posible guztiak, horregatik Josebarengan konfiantza izango dut eta berak esandakoaren alde egingo dut.
