Martxoaren 26an Nafarroa Arenan bildu ziren Binakako finaleko protagonistak, finaleko pilotak aukeratzeko. Final luzea eta gogorra aurreikusten du katedrak, eta Nafarroa Arenak materiala ohi baino gehiago desgastatzen duela kontuan hartuta, materialarekin kezka zegoen.
Pilotak aukeratzeko denbora guztia, 10 minutu, agortu zituzten Ezkurdiak eta Rezustak. Kontzentratuta eta tarteka deseroso aritu ziren. Artolak eta Mariezkurrenak lehenago aukeratu zituzten euren pilotak, konforme, baina besterik gabe. Izan ere, pilotariak materialarekin ez ziren guztiz gustura geratu, Ezkurdia eta Rezusta bereziki. Laurek aukera eskasia nabarmendu zuten.
Pilotak aukeratzeko “zalantza asko” izan zituztela azaldu zuen Ezkurdiak, eta kritiko azaldu zen. “Orain arte txapelketan nahiko garbi izan dugu zer pilotarekin jokatu, txispa duten pilotak, graziarekin ibiltzen direnak eta min egiten dutenak, baina ez dira azkar ateratzen, hori iruditu zaigu. Ez zaizkit gustatu, duda asko izan ditugu”. Material sosoa, espero den final luzerako. Rezustak pilota gutxi zeudela azaldu zuen. “Bakarren bat gehiago izatea eskertuko genukeen. Frontisetik askorik irteten ez diren pilotak ere nahi genituen finalerako, baina ez ditugu”.
Mariezkurrenak aitortu zuen Nafarroa Arenak “pilota zertxobait gehiago” onartu ahal zuela, “baina atzeko koadroetan nahikoa airea hartzen du eta errebotera berehala sartzen da. Horregatik agian hautatzaileak materiala pixka bat doitu behar izan du. Nolanahi ere, hautatutakoekin kontentu gaude”.
Hala ere, finalari begira ez dutela “batere aitzakiarik” nabarmendu zuten lau pilotariek, eta finala “orekatua, gogorra eta estua” izango dela.
Bi estrategiak
Mariezkurrenak eta Artolak aitortu zuten jokoaren karga atzean jartzen saiatuko direla. “Logikoa da: biok batera, frontoiaren atzealdea kargatzen saiatuko gara, ea Beñati lana zailtzen diogun. Eta Iñakik, pilota aurrean duenean, tantoa bukatzea; hori da beste gako bat” azaldu zuen Mariezkurrenak, argi eta garbi. Halaber, hutsik ez egiten saiatu beharko direla nabarmendu zuten Baikokoek, “haiek ez dutelako hutsik egiten”.
Rezustak nabarmendu zuen “bonbardaketarako prest” dagoela. “Barneratua dut, eta ez dut beldur berezirik. Eurei jokoa zailtzen saiatuko naiz” ziurtatu zuen. Izan ere, Ezkurdiak eta Rezustak pilotari erritmoa eman nahi diote, pilota bizi-bizi mugitu, eta Artola eta Mariezkurrena mugiarazi. Berriro ere, hasieren garrantzia nabarmendu zuen Ezkurdiak. “Hasieran asmatu beharko dugu, bai ala bai. Intentsitate aldetik, erritmo aldetik, hozka egiten eta partida apurtzen, beraiek jotzaileak direlako.
Ezkurdiak eta Rezustak Binakako bina txapela dituzte, eta hirugarrena litzatekeena lortzea “ilusio handia, sekulakoa” litzateke. Finalean egotea, berez, “saria” da. Aldiz, Artolak eta Mariezkurrenak Binakako palmaresa mustu nahiko lukete.
Laurak jakitun dira final oso gogorra izango dela, oso fisikoa. “Latza”.