2025eko Durangoko Azokak ez du kartel bakarra izango, "guzitak izango ditu", azaldu du iruditegiaren sortzailea den Iratxe Reparaz arbizuarrak, aurkezpenean. Azokak egindako eta egiteke duen ibilbidea oinarri hartuta garatu du unibertso bisual berria, azaldu duenez, azoka ezin delako irudi bakar batean laburbildu. Eskuz marraztutako 60 baten aurkikuntzatik sortu zen, "zenbaki bat baino gehiago zen, ibilbide bat, mugimendu bat, egin dugun bidea eta oraindik egiteko duguna irudikatzen duena". Kartel bakoitza euskal kultura bizitzeko modu bat dela gaineratu du.