Joan den ostegunaz geroztik Bakaikuko Udalak web orrialdea du: www.bakaiku.eus. Udalak aurkezpenean esan duenez, “bakaikuarrei gertutasuna eta gardentasuna eskainiko duen tresna izatea” nahi du, “eta herria ezagutu nahi dutenendako erabilgarria izatea nahiko genuke.
Aldi berean, tramiteak telematikoki egiteko aukera ematen du egoitza elektronikoak: eskaerak aurkeztu, eta abar”. Horretaz aparte, bestelako atalak ditu web orri mustu berriak: gaurkotasuna (albisteak eta agenda), udala (antolaketa, zergak, dokumentu ereduak, ordenantzak, estrategia plana eta udal informazioa jasotzeko moduak), herriari buruzko jakin beharrekoak biltzen dituen Bakaiku atala, intereseko telefonoak eta udalarekin harremanetan jartzeko bidea.
Interneterako saltoa emanda, Bakaikuko Udalak “herritarrekiko hurbila eta gardena” izateko konpromisoa bete nahi du. Horretarako, webgunea “tresna garrantzitsutzat” jo du udalak. “Gainera, datozen urteetan atari honen edukietan eta zerbitzuetan sakontzen jarraitzeko asmoa dugu. Horretarako ere herritarren iritziak kontuan hartuko ditugu”. Bakaikuko Udalaren webgunearekin, Sakanako dozena bat udalerri dira Interneten ataria dutenak: Arakil, Irurtzun, Uharte Arakil, Lakuntza, Arbizu, Ergoiena, Etxarri Aranatz, Bakaiku, Iturmendi, Urdiain, Altsasu eta Olatzagutia.