Sakandar bat izango dugu Euskal Herriko III. Mailako Aizkora Txapelketako finalean. Izan ere, igandean txapelketako hirugarren eta azken kanporaketa jokatu zen Anitzen. Hamaika aizkolari aritu ziren, tartean hiru sakandar: Juanjoxe Erdozia etxarriarra, Goizeder Beltza etxarriarra eta Iban Resano dorrobarra. Lau kanaerdiko mozten azkarrena Juanjoxe Erdozia etxarriarra izan zen (9:32), eta Josu Aizpuru nuarbearrari minutu erdiko aldea atera eta gero (10:08). Julen Kañamares hirugarren sailkatu zen (10:22), Arkaitz Jauregi laugarren (10:51), Jesus Etxeberria bosgarren (11:07), Jose Felix Zubizarreta seigarren (12:42), Xabier Garitaonandia zazpigarren (12:49), Iban Resano dorrobarra zortzigarren (13:07), Goizeder Beltza etxarriarra bederatzigarren (13:45), Iñaki Agirre hamargarren (15:00) eta Juan Carlos Lopez hamaikagarren (18:36). Bada, Erdoziak eta Aizpuruk lortu dute azaroaren 22an Goizuetan jokatuko den finalean aritzeko txartela. Haiekin batera Oihan Larretxea (Bera), Arkaitz Olano (Leitza), Ugaitz Mugertza (Mutriku) eta Raul Kastro (Urrotz) ariko dira.