Bigarren denboraldia hastear da Etxarri Aranazko irakurketa taldea. Bere helburua euskaraz irakurtzeko ohitura indartzea da, baina, batez ere, irakurritako liburuen inguruan beste etxarriarrekin hizketatzea eta liburuari buruzko iritziak partekatzea. Taldea irekia da eta nahi duen guztiak parte hartu dezake. “Ez da beharrezkoa irakurle oso trebatua izatea, azken finean, irakurketaz gozatzea eta irakurritakoaren gainean solasaldi-tertulia egitea da helburua” esan digu Aingeru Mikeok.
Aurreneko denboraldian Mikeok berak dinamizatu zituen saioak. Eta ostegunean ere hala eginen du. Baina denboraldi berriko berritasunetako bat da taldeko kideek, txandaka, liburu bana aurkeztuko dutela. Victoriano Huizi udal liburutegian 19:00etan elkartuko dira.
Egutegia
Eguna Liburua Egilea Dinamizatzailea
Lastailak 30 Kristalezko begi bat Miren Agur Meabe Aingeru
Abenduak 20 Autokarabana Fermin Etxegoien Josebe
Ilbeltzak 29 Maitasunezko oihua Katayama Kyoichi Gema
Martxoak 12 Arotzaren eskuak Alberto Ladrón Edurne
Apirilak 30 Behi euskaldun baten memoriak Bernardo Atxaga Alodia
Garagarrilak 11 Aukeratzeko
Liburutegian, 19:00etan, dago jarria liburuen inguruko solasaldi-tertuliarako hitzordua.