Eneko Lazkozek finalerako txartela lortu du

Eneko Lazkoz Atarrabiako kultur etxean. NAFARROAKO BERTSOZALE ELKARTEA

Atarrabiako finalaurrekoa irabazi du bertsolari etxarriarrak 399 puntuekin, eta zuzenean finalera pasa da. Saats Karasatorre laugarrena sailkatu zen

Nafarroako Bertsolari Txapelketaren lehenengo finalaurrekoa jokatu zen Atarrabiako kultur etxean atzo, martxoaren 3. Eneko Lazkozek irabazi zuen saioa; hortaz, etxarriarra martxoaren 23an jokatuko den finalera zuzenean sailkatu da. 399 puntu lortu zituen. Saats Karasatorre laugarren sailkatu zen 335 puntuekin.

Atarrabiako finalaurrekoan Aimar Karrika, Saats Karasatorre, Joana Ziganda, Eneko Lazkoz, Sarai Robles eta Xabi Maia aritu ziren. Saio puntugarriaren ostean, Lazkozek irabazi zuen saioa 399 puntuekin. Haren atzetik, Xabi Maia (352,5), Aimar Karrika (349), Saats Karasatorre (335), Sarai Robles (326,5) eta Joana Ziganda (312) sailkatu dira. Guztira, zortzi bertsolari ariko dira finalean, hiru finalaurrekoetako irabazleak eta sailkatutako hurrengo bostak. Beraz, bertsolariek hiru finalaurrekoak jokatzea itxoin beharko dute finalera sailkatzen diren jakiteko.

Larunbatean, martxoaren 9, Etxarri Aranazko kultur etxean jokatuko da bigarren finalarrekoa. Julio Soto, Xabier Terreros, Julen Zelaieta, Diego Riaño, Iker Gorosterrazu eta Iban Garro bertsolariek jokatuko dute Sakanan. Alaitz Rekondo izanen da gai-jartzailea. Sarrerak dagoeneko salgai daude bertsosarrerak.eus webgunean eta Xapatero tabernan. Egunean bertan kultur etxearen leihatilan salduko dira ere. Igandean, martxoaren 10ean, hirugarren eta azken finalaurrekoa jokatuko da Lesakan.

Atarrabiako finalaurrekoaren sailkapena   
Eneko Lazkoz 399
Xabi Maia 352,5
Aimar Karrika 349
Saats Karasatorre 335
Sarai Robles 326,5
Joana Ziganda 312

 

Etxarri Aranazko finalaurrekoan ariko diren bertsolariak 
Kultur etxea. Martxoaren 9, 17:30
Diego Riaño
Iban Garro
Iker Gorosterrazu
Julen Zelaieta
Julio Soto
Xabier Terreros

 

Lesakako finalaurrekoan ariko diren bertsolariak 
Harriondo kultur etxean. Martxoaren 10, 17:30
Alazne Untxalo
Eneko Fernandez
Joanes Illarregi
Josu Sanjurjo
Saioa Alkaiza
Xabat Illarregi