Sakanako Mintzakide programak euskara praktikatzeko aukera ematen du. Horretarako, sakandarrak lauzpabosteko taldeetan elkartzen ditu. Haietako batek ongi daki euskara eta ikasten edo mihia askatzen ari diren gainontzeko taldekideen gidari egiten du. Taldeak astean behin ordu batez elkartzen dira euskaraz hizketatzeko. Topaketak tabernan, elkartean, paseatzen, bizikletan, zinemaren ondoren… nahi den bezala eta nahi denean izaten dira.
Mintzakide programan parte hartzea doakoa da. Mintzakide izan eta euskara praktikatu nahi duenak 600 482 024 telefono zenbakira hots egin edo Whatsapp mezua bidali dezakete. Izen ematea doan da. Mintzakidetik jakinarazi dutenez, gaur egun Etxarri Aranatzen talde bat osatzeko jende bila dabiltza. Euskara praktikatu edo ikasten ari direnei lagundu nahi dietenek aipatu telefonora hots egin dezakete. Taldea ostiraletan, 19:00etan, Xapatero tabernan bilduko litzateke.
Horretaz aparte, Sakanako Mintzakidek hilabetean behin Sakanako altxorrez gozatzeko aukera ematen du ibilaldi baten bidez. Igandekoa Ihabar eta Irañeta artean izanen da. Parte hartzaileek Orakongo iturria, monumento diren Irañetako haritzak, Irañetako Basabeko borda eta Ihabarko Arbeltz gaztandegia ezagutzeko aukera izanen dute.
Herria | Eguna | Ordua | Tokia |
Irurtzun | Asteartea | 18:00 | Iratxo elkartea |
Ostirala | 09:00 | Pikuxar | |
Ostirala | 19:00 | Pikuxar | |
Lakuntza | Osteguna | 18:00 | Tokiz txandakatzen da |
Arbizu | Osteguna | 18:00 | Juanito taberna |
Iturmendi | Astelehena (bi astean behin) | 19:00 | Aritzaga elkartea |
Altsasu | Astelehena | 16:00 | Koxka |
Osteguna | 10:00 | Kukuerreka elkartea | |
Osteguna (bi astean behin. Euskalkia praktikatzeko) | 20:00 | Lezea | |
Ostirala | 09:00 | Kaixo | |
Ziordia | Ostirala | 16:00 | Liburutegia |